‘Indian 2’ tu 2024 laga sobsey dangor Tamil film hoisey

New Delhi, July 15 : ‘Indian 2’ release huwa laga first hapta te box office te etu film tu thik thak hey chuli thakisey. Duniya laga box office te etu film laga performance tu bisi bhal hoisey. Eman bhal hoisey ki etu film tu etu saal laga sobsey bisi kamayi kora Tamil film hoisey. Aro ‘Maharaja’ laga kamayi ke paar kuridisey. Etu Kamal-Hassan thaka film tu 3 din te Rs 109 crore maan poisa kamaisey. Etu kimat tu Vijay Sethupathy laga film para olop bisi aseykuntu tu Rs 105 crore kamaisiley. India te ‘Indian 2’ film tu first hapta te Rs 59.15 crore kamaisey aro bisi bhak poisa tu Tamil market para ahisey. Rs 59.15 crore para, Rs 41.55 crore tu Tamil version ekla para ahisey. Etu tu asurit kuridiya laga nohoi kilemaney Tamil Cinema te Kamal Hassan tu manu khan para bisi khusi pa actor majotey ekta asey. Dusra desh te etu film para Rs 69 crore kamaisey aro Indian market te Rs 40 crore maan kamaisey. Hoilebi etu sob record laga bawajut, etu film tu expect kora nisna perform koranai. Kamal Haasan laga stardom(mashoor status) aro director Shankar laga legacy hisap te, etu film ke India te first hapta te komsikom Rs 100 crore opor kamabole expect kuri thakisey. Hoilebi manu khan para etu film laga bari te biya review diya para etu ke expect kora nisna chulibole mushkil kuridisey.