Raghav Juyal : ‘Khusi asey ki Shah Rukh Khan tak bi film te villain laga role kurikina gusisey’

New Delhi, July 15 : Dancer para actor hoija Raghav Juyal tu Nikhil Nagesh Bhatt laga Kill film te Fani laga role kora nimitey bisi tarif pai asey. Tai tu gunda laga leader laga role kuri asey, kun khan train passenger para saman loootibole ahey aro Lakshya laga character NSG Commando Amrit Rathod logotey mara mari korey. Etu negative role kora picheyte, Raghav para aro ekta villain laga role kuribole asey. Aro etu Farhan Akhtar aro Ritesh Sidhwami laga para produce kora film Yudhra te asey kuntu te Siddhant Chaturvedi aro Malvika Mohanan main role te asey. Ekta exclusive interview te, Raghav para reveal kurisey ki judi negative role kora toh film te gusa laga ekta ekla tarika asey . Tai para koisey, “Amikey hero vero laga role pai thakanai…amilogotey ekta launchpad nisna eku thakanai. Ami film te audition laga through te hey gusibole lagisey. Aro ami para Kill aro Yudhra te role tu audition kurikina paisey. Hoilebi amilaga next show te, kuntu ekta web series asey Gyara Gyara, etu tea mi main role kuri asey. Utu tea mi bisi bhal manu asey(enaka koikina tai hasisey). Aro etu bi ami audition dikina paisey. Toh, amilogotey khali negative role ekla kuribo koikina eku plan thakanai. Ami eman priviledged nohoi ki ami khali etu film hey kuribo nohoilebi khali Yashraj logotey hey kaam kuribo aro …ami ke tu mazdoori kurikina hi agey baribo lagibo.” Raghav para Shah Rukh Khan logotey tailaga connection point out kurisey. Kilemaney taikhan duijun para bi film te taikhan laga journey tu ekey tarika para suru kurisey. Tai para koisey, “ Ami bisi khusi asey ki Shah Rukh Khan tak bi tailaga career laga suruwat te film khan te villain laga role kurikina gusisey.” Enaka rumour(hosa asey na nai najana khobor) chuli asey ki Raghav tu Shah Rukh Khan laga chokra Aryan Khan laga first film Stardom te lead actor khan majotey ekta hobole asey.