Nagaland Government para PM-USHA (Pradhan Mantri Uchchatar Shiksha Abhiyan) under te aro 6ta model college banabole proposal rakhisey. PM- USHA tu centre para rajya/UT institution ke fund kuribole(poisa dhalibole) nimitey sponsor kora scheme asey. Kuntu laga vision tu rajya laga higher Education System ke behtar kuribole laga asey. Ageyte etu scheme tu RUSA laga under te thakisey. Etya new education policy 2020 aha logotey etu scheme ke PM-USHA koikina launch kurisey.
2023 te duita nutun model college banaisiley. Ekta Wakching aro dusra Mangkolemba te. Wakching laga model college para science stream offer kurisey aro Mangkolemba laga Arts stream. Hoilebi, etu duita college te bi bisi komti student enroll hoikina asey. Aro etu tu college join kuribole ageute student khan pora school aro Dimapur, Kohima aro Mokokchung nisna district te thaka college te ja, etu duita problem nimitey asey. Etya, director of Higher Education para bi koisey ki Nagaland te thaka sob ekla cholai thaka aro ekta stream ekla thaka college khan bon kuridibo. Aro ekta bisi stream thaka college banaidibo. Etya laga situation para etu duita model college laga future dikhai asey kuntu te ek rati tee man bisi student ahibole nohoi. Etu tu policies khan bana laga tarika opor te bi asey.
NEP 2020 laga under te sobsey dangor challenge tu alag alag stream/course offer kora college thaka laga asey. Aro ekta dangor challenge tu alag alag stream offer kora college anibole nimitey majboot infrastructure(building aro alag subidha khan) banabole poisa laga kami thaka asey. Ekta example tu, Dimapur Government College te Science Block nimitey Academic building bana tu complete nohoikina dui saal opor hoi asey. Etu science block chola suru hobole bakia sey kilemaney etu nimitey saman khan aro laboratory laga bustu khan laga dorkar asey. Aro sobsey jaruri tu sikhabole lagiya staff laga post banabole aro nutun staff appoint kuribole laga dorkar asey. Hoilebi etu tu bisi dur laga kotha nisna asey. Kilemaney nutun model college khan suru kuribole tak bi, kunba teacher khan ke dusra college para borrow kuribole lagisey. Aro etya Nagaland laga 17 Government College te lagiya la hisap te 145 Assistant Professor ke contract hisap te appoint kurikina asey. Aro etu contractual Assistant Professor khan tu baki regular teacher khan nisna ekey sikhai asey hoilebi tankha komti pai asey. Aro service extend kora laga alava, government tu PIMS extension bi delay kuri asey. Aro etu nimitey etu contractual teacher khan tu tankha napaikina kaam kuribole majbur hoikina asey. Taikhan laga tankha bi nidiya tu government laga part te taikhan logotey na-insaafi kora asey. Enaka halat te kunba para bhal quality laga education dibole kinaka akha kuribo parey?
Etya, NEP 2020 laga etu nutun Four Year Under Graduate Programme under te Nagaland University para 4th year laga suruwat conditional banaidisey.Hoilebi etu 4th year aro Post-Graduate Program suru kuribole nimitey etu condition ke pura kuribole college khan ke upgrade kuribole aro infrastructure(building aro alag subidha khan) barabole laga jarurat asey.
Sob district te higher education institutions(college khan) laga dorkar thaka tu sob college te student laga number ke asaani para streamline kuribole nimitey bi asey. Kuntu para utu college khan laga bojh komaidibo kotey student tu capacity para bisi enroll hoikina asey.
Add Comment