Samaj te bodli aha

hoithaka zamana logotey adjust kuribole nimitey nijor ke etu fale akhirshit huwa pai asey. Chutu mutu job khan te bi technology laga istamal kora para bi manu khan laga jibon te bisi dangor effect kurisey. Aro taikhan laga sikha, bhabna kora aro baat-chit kora laga process te bodli anibole majbur kuridisey. Technology para etya society aro community laga social set-up te bodli ani asey kuntu laga natija tu positive bi aro negative bi asey. Hosa koisey koiley, society nimitey technology laga effect tu bhal na biya asey etu tu manu khan para technology laga istamal kinaka kuri asey etu opor te asey. Amikhan para positive fale saisey koiley, technology tu bisi bhal aro chamatkar kuridiya laga asey koikina pabo. Kilemaney etu para communication ke improve kuridikina life ke aro bisi asaan banaidisey. Aro technology khan nimitey soch aro idea ek dusra logotey share kora tu lightning laga speed te hoi asey aro eku badha nathakikina hoi asey.  Etu para information(jankari) pabole asaan kuridikina education aro sikha laga process ke behtar kuridisey. Technology nimitey culture te bisi dangor bodli ahisey. Ajikali baat-chit kora laga tarika aro jariya tu bodli hoikina poila nisna nathaka hoijai asey. Bisi manu khan etya face-to-face kotha kuribole diktar pai. Dusra kotha te, bisi bhak manu khan asol-zindigi laga situation te  baat-chit kuribole laga ability haraidisey. Aro etu khan para culture ke influene kuri asey. Hosa kobo koiley, etya technology para society/community khan laga culture ke technology para akar di asey. Nagaland laga context te, Information Technology te ekta nutun turn aha te nijor laga ekta kahani asey. Etu nutun bodli aha para GenZ laga jibon ke bisi dangor para prabhabit kurisey. Kuntu tu amikhan laga manu khan para poila te bhabna kora tarika para ekdam alag asey. Hoi, etu bodli aha para amikhan laga rajya ke international map te dhalidisey, hoilebi sawal tu etu asey: etu para hosa te bi amikhan laga rajya laga face ke bhabna kora hisap te bodli anisey naki? Hoilebi purana jamana laga bisi bhak manu khan para etu bhabna korey ki amikhan laga rajya tu jaija homoitey bisi shanti thakisey. Taza khana, pure natural pani, dangor green jaga, komti pharmacy, komti bimari aro overall ekta khusi thaka jamana thakisey. Dusra faley, aji amikhan tu behtar rasta aro building, connectivity, train aro behtar transport facility, bridge aro  hospital, smart project  khan laga terms te agey barisey kuntu laga focus tu seher ke kunba foreign nisna dikha jaga laga pattern te banabole laga thakisey. Nagaland, kuntu tu etihasik hisap te teji para bari thaka technology ke resistant thakisey, etu Nagaland para jaija olop saal te ekta dangor bodli aha dikhisey. Etu nutun zamana te mobile internet laga prabhav bari asey aro etu logotey social media laga influence bi bari asey. Ekfale, etu para jankari pabole, communication aro duniya laga trends te bisi modod kurisey. Dusra faley, smartphone laga addict kuridiya nature ahisey kuntu para social dynamics(matlab samaj laga manu khan majotey baat-chit kora aro ekjun ekjun ke lok kora) ke bodli kuridisey aro manu khan laga beybohar ke influence kurisey.