Guru aro dhorom

Jagadguru Shankaracharya Swami Avimukteshwaranand Saraswati laga guru kata te ban kuridibole aro north east laga state khan te  guru ke ‘Gau Ma’(India laga ama) laga status dibole laga mission te bisi badha ahia sey. Khali Sikkim aro Assam ke charikina, kotey Hindu majority dhorom asey. Sikkim te, etu Swami laga cow mission programme tu September 24 para 25 taak, eku jhamila na-olaikina khotommhoisey. Hoilebi, September 26 te Arunachal Pradesh laga Donyi Polo Airport te landing kora picheyte, etu Swami laga swagat tu ekta dangor protest logotey hoisey, kuntu ke All Arunachal Pradesh Students Union(AAPSU) para lead kurisiley. Arunachal Pradesh te Buddhist majority thaka logotey Hindu dhorom thaka manu laga population bi bisi thaka laga bawajut bi student para enaka protest kora para etu state te enaka religious(dhormic) campaign kora tu khusi napa laga dikhaisey. Arunachal Pradesh te enaka situation laga samna kora laga bawajut  etu swami tu haar namanikina Dimapur, Nagaland te tailaga private flight loikina jaisey. Dimapur te landing kora picheyte, swami para aro bi badha laga samna kurisey. Hoilebi, etu baar, taikey local authorities khan para airport para agey baribole diyanai. Swami ke airport para agey baribole nidiya  tu Nagaland laga bisi organization khan para Swami laga Dimapur aro Kohima visit kuribole  laga maksat laga khilaf te gusa jata picheyte public order diya nimitey  thakisey. Nagaland laga government logotey eku jhamila olabole nidibole karney Swami ke Dimapur aro Kohima travel kuribole para rokhaidiya laga alava dusra eku opai thakanai. Last te, swami tu tailaga private flight loikina Guwahati te jabole lagiya hoisey. Kotey para tai etu cow mission ke Shillong, Meghalaya te agey loijabole kosis kuribo. Ekta fale, Swami laga etu mission tu purapuri nutun aro nijor para ola laga nohoi. Kilemaney guru laga suraksa tu India laga constitution(likhikina thaka nyom aro kanoon) te dhalikina asey. Hoilebi, etu guru kata ke ban kora laga mamla tu sensitive(jhamila olaidiya) aro politics hisap te thik nathaka laga asey, khas kurikina utu jaga khan te kotey kha-luwa laga tarika aro dhorom mana tu alag alag asey. Swami para northeast, kotey tribal culture laga nijor laga nyom aro tarika asey aro Christian manu khan bisi asey, enaka jaga te  etu mission agey barabole laga kosis kora te badha tu ahibole hey asey. Hoi, guru logotey jurikina thaka dhormic soch aro feelings tu buji asey hoilebi khas kurikina northeast nisna alag alag jati, dhorom laga manu khan boha jaga te ki khabo aro ki nakhabo etu laga faisla tu nijor opor te thakibo dibo lagey. Swami para guru ke ‘Gau Ma’ declare kuribole mission para religious sentiments(dhormic feelings) aro ekta rajya nohoilebi jaga laga nijor laga tor-tarika hisap te chulibole laga haak laga majotey jhamila ola tu dikhaia sey.  2015 te jitya anti-cow slaughter(gura kata laga khilaf te ja) mamla   aro India te guru laga opor te nigrani rakha  laga nyom tu ekta ucchayi te pungchikina thakisey union minister Kiren Rijiju para Mizoram te visit kora homoitey ekta mashoor statement(bayan) disiley. Kiren Rijiju para tailaga colleague Mukhtar Abbas Naqvi para guru mangso kha manu khan tu Pakistan te jabo lagey koikina kuwa kotha tu lobole napara laga asey koisey. Aro taikey  guru khabole para kun rokhabo paribo koikina sawal kurisey.  Etya, guru kata ke ban kora laga dusra taraf te mangso, khas kurikina red meat(lal mangso) jarurat para bisi kha para gao te biya asar kora laga bisi khulasa hoi asey. Tribal manu khan, khas kurikina pahari north eastern rajya khan te thaka khan para etu manibo lagey ki lal mangso jaiseki guru, saguli khan over khaidiya tu gao nimitey biya asey. Etu magso khan ke hisap te khabole encourage kuribole nimitey etya thik homoi asey. Etu kuwa tu guru kata nohoilebi guru mangso kha te ban kora ke support kuri asey koikina galat bhabna nukuribo lagey hoilebi gao nimitey koi asey koikina lobo lagey.