Jui para bachibole laga upai

Ajikali huwa ghotna khan te,  Dimapur te dangor jui para bisi ghor khan julikina rakh hoijaisey. Etu ghotna khan para etu dikhai asey ki jui para bachibole nimitey alag alag kisim laga  upai olabole bisi jaruri asey. Jui  dangor hobole ageyte etu ke joldi bujhaidibo lagey. Hoilebi jui bujha manu khan kiman bahadur hoisey koilebi, judi taikhan bisi manu nathakisey koiley taikhan laga kosis tu bekar hoijai. Jui bujha gari khan para jui jola jaga te pungchibole nimitey face kora sobsey dangor musibat tu encroachments asey, kuntu para Dimapur laga alag alag colony khan te rasta bisi chutu kuridisey. Authorities khan para rasta laga width aro reservation area nimitey thaka kanoon ke strict para lagu kuribo lagey. Taki gari khan eku diktar nohoikina aha-juwa kuribo paribo. Aro jui bujha gari khan bi jaga te para-tak joldi pungchibo paribo. Jui khan laga mamla te ekta safety measure(suraksa laga upai) nimitey, government para etu nyom tu lagu kuribo lagey. Enaka homoi bi thakey, jitya jui bujha truck khan pani pa laga khali ekta hey jariya thakey. Aro etu tu bisi serious para loboley lagiya la kotha asey. Mushkil homoitey jui bujha gari te pani refill kuribole nimitey pani store kora laga subidha thakibole laga mamla te bisi soch-vichar kuribole jarurat asey. Fire safety(jui para suraksa) nimitey government bi zimidar asey. Aro thik kadam na-utha tak etu khatra tu thakibole asey. Jui bujha manu aro gari  khan para problems lok pa majotey ekta problem tu jui jola laga khobor pa picheyte jaga te para tak joldi pungchibole napara tu asey. Kunba rajya khan te jitya building khan banai, fire safety rules khan follow kuribo lagey. Aro building banaikina khotom huwa picheyte malik khan para fire safety certificates pabo lagey. Dimapur te, julija bamboo para bana temporary ghor khan tu julija laga khatra te asey. Yatey boha manu khan enaka electrical line taney kuntu tu biya quality laga thakey nohoilebi kuntu khan ke bisi joints picheyte taney. Etu khan para picheyte jui olaidiye kuntu khatarnak para dangor hoijai. Aro, dusra tu etu asey ki Dimapur seher te dukan aro business khan laga number barijai asey, etu nimitey government para enaka rules strict para lagu kuribo lagey kuntu para store room khan te jui lagibole laga chemical aro bustu khan rakhibole mana korey. Government para hotel, restaurant aro bakery khan laga stove bi check kuribo lagey kun khan LPG nohoiley koila cholai. Taki etu khan jui para bachibo. Manu bisi thaka jaga khan te thaka gari laga garage khan ke bi dusra jaga loijabo lagey. Kilemaney tail aro grease aro gari laga tanki te bhora fuel khan bi khatarnak hobo parey. Jitya jui joley, asani para jola tail para mamla ke aro mushkil kuridiye kilemaney pani para etu ke bujhabo napara hoijai. Etu tu ekta important warning bi asey ki jui bujha truck khan te chemical foam bhoraikina thakibole bisi jaruri asey. Jui bujha department te mondikina kaam kora aro bhal para trained thaka officers thakibo lagey. Aro etu kaam kora manu khan ke sahi kapra, safety gear(jaiseki face mask0 aro dusra jarurat laga saman khan bi dibo lagey. Dangor jaanleva jui khan ke rokhabole nimitey etu problems khan thik kuribo lagey.