Teen-saal picheyte, Union Ministry of Home Affairs (MHA) para juwa December te Nagaland, Manipur aro Mizoram te Protected Area Permit (PAP) kanoon wapas anisey. Etu kadam tu Manipur te suraksa laga problem barithaka nimitey uthaisey aro osor te thaka desh para manu khan thakibole aha logotey jurikina asey. Etu kanoon wapas ana para tourism aro rajya laga development te etu laga asar laga bari te aro ekbar behes olaidisey. Etihas hisap te, PAP tu India laga northeastern state khan te ekta behes olaidiya laga measure asey. 1958 laga Foreigners (Protected Areas) Order under te, dusra desh laga manu khan tu international borders osor te thaka protected areas te gusibole nimitey special permit lagey. Etu permit khan nimitey strict guidelines follow kuribo lagey, kiman din thakibole asey aro kuntu rasta travel kuribole asey etu ke loikina. Aro izazat nathakikina dusra rasta fale ja nohoilebi thaka laga homoi extend kuribole mana asey.
Hoilebi, etu nyom ke bisibhak criticize kurisey. Kilemaney etu para tourism(dusra jaga aro desh para manu khan berabole aha) te ekta rokh lagaidiya laga asar kurisey aro tourism tu etu rajya khan nimitey poisa aha laga ekta important source asey. Etu yaad kuribo lagey ki UPA-II para 2011 te Nagaland, Manipur aro Mizoram para PAP hataidibole faisla luwa tu bisi jag ate etu rajya khan ke India laga dangor tourism narrative te join kuribole fale ekta kadam utha asey. Utu homoi laga Union Tourism aro Culture Minister Ambika Soni para UPA-I government para raaj kora homoitey awas utha, etu relaxation laga aim tu Northeast laga natural aro cultural heritage laga nuchukina thaka kabiliyat tu unlock kuribole laga asey. Assam aro Meghalaya nisna osor te thaka rajya khan te poila para etu restriction nai. Aro etu tinta rajya Nagaland , Meghalaya aro mManipur para bi PAP hataidiya para bisi dangor faida anidisiley. PAP hataidiya para etu rajya khan te tourist aha tu barijaisey kuntu para etu jaga khan laga economy baraikina employment laga opportunity banaidisey. Aro etu community khan majotey akha laga ekta nutun soch dhalidisey kun khan bisi homoi para underdevelopment aro bhitormanu laga chaya te thakisey. Etu nimitey olop din ageyte etu PAP ke wapas lagu kuribole laga bayan para etu faida khan te ekta jhatka nisna asey. Etu laga khilaf te thaka manu khan para behes kurisey ki etu tu progress ke rokhaidiya laga ekta kadam asey kuntu para etu rajya khan ke India laga tourism industry te ekta dangor khilari hobole laga kabiliyat ke rokhai asey. Ekta behtar proposal diya manu khan para koisey ki desh laga suraksa laga mamla khan tu kanooni tarika para desh te aha tourist khan nimitey badha anikina already mojud thaka system para thik kuribo paribo.Law enforcement agency khan. Centre aro state duita laga bi, taikhan tu tourist laga activity khan te nazar rakhibole tayar asey, taki taikha nyom laga hisap te chulibo. Northeast tu enaka juncture te khara asey kotey security laga dorkar para bi dusra desh logotey connectivity thaka laga faida faley bisi saboley lagey.
Add Comment