Health scheme laga galat istamal

Olop din ageyte Nagaland te Ayushman Bharat Pradhan Mantri Jan Arogya Yojana (PM-JAY) aro Chief Minister Health Insurance Scheme (CMHIS) laga under te health insurance service suspend huwa para public laga subidha nimitey ola etu programme khan chola opor te sawal khara koraidisey. Poisa laga galat istamal kora, fraud aro miscommunication laga mamla olaithaka majotey etu mamla ke bhal para investigate kuribole jaruri asey. Taki etu subidha pabole thaka manu khan ke jawab dibo pribo aro taikhan laga biswas tu banikina thakibo. Nagaland Health Protection Society (NHPS) para Department of Health & Family Welfare under te chola etu schemes khan tu rajya laga hazar opor manu, including government employees aro pension kha manu khan nimitey ekta lifeline(zinda thakibole laga jariya) asey. Hoilebi etu scheme khan suspend huwa para system te ekta crack nohoilebi bhangikina thaka tu dikhai asey. Aro etu scheme khan ki maksat nimitey banaisey etu maksat ke hey khatra te dhalidisey. NHPS laga CEO Thavaseelan K para olop din ageyte etu mamla te kotha koisey. Tai para koisey ki etu scheme laga under te service suspend hoija laga karon tu insurance company Future Generali India Insurance (FGI) logotey galat-fremi huwa nimitey asey. Tai para etu service khan wapas anisey koikina biswas dilaisey. Hoilebi FGI laga taraf para taikhan etu scheme ke implement kuribole diktar pa laga reason tu khula khuli nidikha nohoilebi lukaikina rakha para bisi sawal khara korai asey. 2023-24 aro 2024-25 fiscal year(12 moina laga homoi kuntu ke business khan para poisa aro tax khan laga report likhibole cholai) majotey, NHPS para 87 crore opor poisa bhak kurisey kuntu para 33,700 maan manu ke modod paisey. Etu poisa khan tu insurance company hoilebi ekta government organization logotey jurikina thaka hospital khan te bhak kuridisiley. Hoilebi, Thavaseelan para kunba hospital khan para fraud kurisey aro poisa laga galat istamal kurisey koikina admit kora tu chinta kuribole laga kotha asey. Bill extra olaidiya aro poisa khaidiya nisna galat harkat kora para etu scheme khan lamba homoitak chulibole napara hoijai aro ilaj kuribole aha manu khan laga biswas bhangaidiye kun khan para ilaj pabole nimitey taikhan opor te depend korey. NHPS para aha dui-teen hapta te etya chulithaka claims aro vet payments(ilaj nimitey poisa diya) te  jaanch kuribole nohoilebi nazar rakhibole laga advance kadam uthabole announce kora tu  tarif kuribole layak asey. Hoilebi poisa laga galat istamal kora hospital, taikhan ke ban kuridibole aro taikhan para kha poisa tu wapas hasil kuribole nimitey disciplinary action tu joldi aro bhal para decision loikina lobo lagey. Etu action khan tu dusra khan nimitey ekta warning nisna hobo lagey ki galat kaam khan tu bardash nukuribo. Ageybarikina, NHPS para juwa dui saal te etu scheme under te poisa chola laga detail report dikhaidibo kuwa tu public laga bahrosa wapas banabole nimitey ekta jaruri kadam asey. Salary para deduct kora funds khan  kinaka bhak kurisey etu ke clarify kuribole laga kadam utha para biswas kuribole napara laga bimar lagikina thaka system te lagiya transperancy dibole asey.  Nagaland para rajya laga manu khan ke etu ensure kuribole lagey ki etu scheme khan tu ghotala kora laga ekta source nohoikina, ekta asha laga kiran hoikina thakibo.