January 7, 2025 te Los Angeles laga kunba hisa te jungli jui laga para bisi dangor tabahi anidisey. Etu ghotna te 25 manu murisey aro 1,80,000 opor manu khan nijor laga ghor charibole majbur hoijaisey. 250 billion dollar maan laga property nuksan hoisey. Manu mora aro ghor julija aro hazar opor manu khan ghor para dur hoikina thaka laga alava etu jui para dui din agey January 05 te huwa Golden Globe Awards laga events laga bari te ekta dangor baat-chit olaidisey. Comedian Nikki Glaser para host kora etu ceremony tu charcha laga ekta mamla hoisey jitya tai para award accept kora speech te Isor ke kun para bi mention koranai koikina koisey. Tailaga etu tikha majak te audience khan para hasidisey. Aro audience khan tu Hollywood laga mashoor manu khan thakisey. Bisi manu nimitey, etu moment tu Hollywood industry laga Isor ke respect nokora aro serious nuluwa laga nyom laga ekta perfect example asey. Kotey faith(Isor opor te biswas thaka) aro morality tu jaija homoilaga nishan thakisey koikina nazarandaz kuridiye. LA te jui ola pichey para kunba manu khan para awards show aro etu jui majotey connection anikina etu ke Golden Goose laga warning diya khisa logotey link kurisey. Kun manu khan enaka natural barbadi aha te Isor laga warning dikhey, taikhan ke etu jui para Bible te diya warning laga yaad dilai ki “Isor laga majak urabo nalagey.” Dusra khan nimitey, etu kotha khan tu aney mamuli asey aro jui khan tu khatarnak hoilebi natural events asey kuntu toh environment te kiba huwa nimitey olaiasey. Hoilebi, award show aro jui ola, etu duita event ke bhal para saikina compare kurisey koiley etu para utu cultural values laga bari te dangor sawal khara korai asey kuntu ke Hollywood para promote kuriasey. Aro etu values nohoilebi nyom khan tu kinaka kurikina ekta desh logotey juriasey nohoilebi clash kuriasey kotey manu khan laga alag alag biswas asey. Hollywood laga faith(Isor opor te biswas thaka) logotey rishta tu poila para biya thakisey. Hoi Hollywood industry para nijor ke boundaries push kurikina society laga nyom ke challenge kora nimitey garv korey. Hoilebi taikhan para religion(dhorom) ke dikha laga tarika tu bisibhak respect nathaka nohoilebi sidha mazak hoijai. Khas kurikina Christian dhorom tu bisibar mazak laga target hoi thakey. Khula khuli Isor ke biswas dikha actor aro creator khan laga career tu bisibhak homoi ageyte khotom hoijai. Film laga dialogue khan te Isor aro dhorom laga insult kora aro etu logotey poila para thakikina aha biswas ke tabah kuridiya kahani khan para utu audience khan ke samaj para alag kuridisey kun para taikhan laga dhormic biswas tu ekdam tagra thakey.
Jui para zameen aro manu khan laga jibon laga jariya duita ke bi barbad kuridiya homoitey, etu moment para amikhan ke bhal para bhabna kuribole diasey. Etu jui ola tu Isor laga warning nohoilebi nature laga consequence asey koikina saisey koilebi etu tu ekta opportunity asey amikhan nimitey khali creativity aro respect laga majotey boundary thaka laga bari te hey nohoikina duniya laga sobsey mashoor industry laga sahi-galat nyom khan opor te bi bhabna kurisabole laga asey. Jui laga rakh khan majotey, Hollywood nimitey TV laga nakli zindagi aro asol zindagi ke shape kora values khan majotey balance rediscover kuribole laga ekta chance asey.
Add Comment