Nagaland NET Qualified Forum (NNQF) para olop din ageyte Nagaland laga Governor ke Higher Education Department te contractual assistant professor khan ke etya regular kurithaka laga mamla te action lobole request kurikina ekta open letter likha para ekta bisi important aro logalog sabole laga problem was olaidisey. Etu khobor para aro ekbar public advertisement te nadhalikina contractual appointment kora(contract hisap te kaam te dhala) laga mamla ke samney anisey. Aro etu ke “backdoor” appointment koi, Nagaland Government majotey.
Etu NNQF para ageybarikina etu contractual assistant professor khan ke regular kuridiya laga process te nyay aro kanoon laga concern uthaikina koisey ki enaka appointment khan laga khilaf te likha bisi petition khan tu Gauhati Court laga Kohima Branch te etya judgement chuliasey.
NNQF para September 2022 te Minister of Higher Education ke court para etu mamla te faisla nahuna taak regular kuridiya laga process rokhaikina rakhibole request kora laga bawajut bi December 18, 2024 laga ekta notification te contractual assistant professor khan ke department te gusaidiya dikhaisey.
Kanoon laga larayi tu misamisi bisi lamba tanidisey. November 2024 te jitya NNQF para 2022 te 34 contractual teachers laga appointment ke challenge kurikina petition file kora laga case te akhri bar hearing hoisey, Court para etu case ke November 19 tak te khotom kuridibo koisiley.
Hoilebi, Government Advocate para request kora nimitey, etu mamla te faisla hunabole nimitey aro 3 weeks laga homoi disiley. Etu nisna, 2023 te arobi contractual appointment kora laga khilaf te court te petition file kora tu etya court para mukadma chola laga alag-alag stage te asey. Aro enaka kurikina etu tu biis homoi loiasey.
Etu toh pakka kobo naparey ki contractual teacher khan ke regular kuridiya tu etu petition khan te shamil thaka manu khan logotey milikina asey na nai. Hoilebi, clarity ekta nathaka para manu khan laga mon te doubt aniasey. Higher Education Department para etu mamla khan ke address kuribole nimitey aro shaak thaka tu dur kuridibole nimitey tailaga position tu clarify kuribo lagey, judi etu shaak tu hosa nohoisey koiley. Enaka mamla te chup thaka para manu khan laga doubt ke aro baraidiasey aro etu recruitment(kaam te dhala) laga process te imandari opor te bisi sawal khara kuridiasey.
Backdoor appointment laga natija tu barai-charaikina kobo naparey. Enaka harkat khan para public laga government opor te thaka biswas tu haraijai. Student khan nimitey, taikhan ke class te sikha manu khan laga appointment tu sahi tarika para na galat tarika para hoisey koikina doubt thakija para taikhan ke nirash kuridibo parey. Aro etu para education laga quality ke effect kuribo. Assistant Professor hobole kosis kurithaka candidate khan nimitey, enaka backdoor appointment kora tu ekta bisi dangor anyay asey.
Etya-etya laga challenge tu etya chulithaka appointment tu sahi na galat asey etu te action lobole laga asey. Hoilebi, aro bi dangor aro urgent kaam tu system te bodli anibole laga asey. Government para public laga biswas banaikina rakhibole aro sytem opor te taikhan laga bharosa wapas anibole nimitey recruitment process ke safa kuribo lagey.
Nagaland, kotey employment opportunity komti aseya ro government job tu kamabole laga main source asey, enaka te lagatar backdoor appointment kurithaka tu dusra khan nimitey bisi dangor anyay asey.
Add Comment