Union Finance Minister Nirmala Sitharaman para February 1 te tailaga 8th budget present kurisey. Kuntu te India laga fiscal policy te dangor bodli anidisey. Sitharaman laga Budget ke bisi manu para tarif kurisey, khas kurikina million opor middle class tax diya manu khan laga awas ke hunidiya nimitey, kun khan 10 years para bisi nazarandaz aro neglect hoikina aro kun khan ke lootikina thakisey. Etu bar laga budget para middle class laga poisa laga bojh komabole bisari asey. Sobsey tarif kuribole layak announcement tu saal te Rs 12 lakh kama manu khan laga income tax hataidibole laga decision luwa tu thakisey. Etu faisla para middle class manu khan ke ekdam dorkar thaka laga rahat pungchaisey kun khan bisi lamba homoi para eman bisi tax aro saman khan kinibole laga takat komti hoija laga problem te fasikina thakisey. Rs 12 lakh taak laga income nimitey tax hataidiya para dikhai asey ki government para dikhi asey ki private sector investment ke agey loijabole nimitey consumer demand kiman jaruri asey. Middle class khan laga haath te aro bisi use kuribole para laga income rakhikina, etu budget para manu khan khorcha kora tu baraidikina economic growth ke improve kuribole aim kuriasey. Etu faisla para focus change kora tu dikhai asey. Etya corporate tax rates, interest rates aro infrastructure condition khan ke charikina consumer(saman kina manu khan) demand barabole te focus kuriasey. Etu tax maaf kuridiya opor te, budget para Micro, Small aro Medium Enterprises(MSMEs),maiki khan, kisan khan aro education sector ke support kuribole laga faisla bi announce kurisey. Kuntu toh Atmanirbhar Bharat(Nijor opor te depend thaka India) laga vision logotey mili asey. Etu khan para desh te saman khan banabole, nutun ideas olabole aro employment(kaam) olaidibole encourage kurikina India laga self-reliance(nijor opor te dependent thaka) tu improve kuribole expect kuriasey. Agey barikina, etu budget para exports(dusra desh te saman supply kora) baraidibole te jor disey. Etu tu duniya laga economy te India laga position majboot banabole jaruri asey. Aro ekta dangor announcement announcement tu insurance sector te Foreign Direct Investment (FDI) tu 74% para 100% te uthaidiya thakisey. Etu dangor kaddam para duniya laga dangor insurance company khan ke attract kurikina desh te capital(poisa) aha tu baraidibole asey. Etu nutun budget para manu khan ke ekdam khusi anidisey. Hoilebi, yatey market price(MRP) khan baribole laga risk thaki asey. Kilemaney business khan para tax maaf kuridiya laga faida uthabole bisari asey. Enaka situation para khusi laga mood ke biya kuridikina khorcha-pani laga adjustment kuribole mushkil kuridibo parey. Ekta desh ke agey barabole nimitey etu desh laga economy bisi jaruri asey. Hoi economic growth rate laga target tu 8% para komti kurikina 6.5% maan rakhidisey. Hoilebi etu target pura kuribole aro par kuribole nimitey sob sector para milikina kaam kuribole laga jarurat asey.
Middle class aro important sector khan te focus kurikina, etu budget para India ke aro bisi inclusive, nijor opor te depend kora aro safal hoikina thaka laga hobole nimitey rasta khuli di asey.
Add Comment