Nagaland te drugs chola tu ekta bisi dangor problem hoikina asey, kuntu te joldi aro lasting thakibole laga action lobole lagi asey. National Drug Dependence Treatment Centre (NDDTC) laga hisap te, Nagaland tu utu top 10 Indian states majotey asey kotey opioid drugs chola aro drugs inject kora manu laga highest number asey. Etu problem tu khas kurikina northeast faley bisi biya hoikina asey. Sikkim, Arunachal Pradesh, Manipur aro Mizoram nisna state khan te bi nisha huwa bustu chola laga rate bisi high asey. 2016 te Nagaland State Substance Abuse Prevention and Treatment Policy laga approval pa laga bawajut, etu ke lagu kora laga eku asar huwanai. Drug addiction laga khilaf te larayi kora te ekta dangor napungcha laga thakijaisey. 2023 te International Day Against Drug Abuse and Illicit Trafficking te, officials khan para janaisey ki Nagaland te 30,000 maan manu tu opioid drugs chola manu asey, kun khan drugs te hodai din total Rs 550 crore maan felai. Etu dangor kimat para economy aro society te ekta dangor badha ani asey. Hoi, Nagaland tu ekta drugs produce kora state nohoi, hoilebi Nagaland tu drugs transport kora laga ekta main jaga aro drugs bisi chola jaga asey. Morphine, opium aro brown sugar nisna drugs khan Nagaland te illegally ani thakey. Aro Dimapur tu etu illegal saman khan ana-loija kora laga ekta main gateway(par kora jaga) nisna kaam kuri asey. Etu problem kiman dangor hoi asey etu dikhikina, Nagaland government para drug dhanda kora aro chola tu komti kuridibole nimitey ‘War Against Drugs’ suru kurisey. 2024 te, law enforcement authorities khan para Rs 118.83 core maan laga drugs aro illegal bustu seize kurisey aro 343 manu ke arrest kurisey. Hoi etu efforts para drugs laga khilaf te larayi kora tu agey barai asey hoilebi Nagaland tu etya tak bi illegal drugs dhanda kora laga ekta main jaga hoikina asey kuntu Myanmar, Manipur aro dusra Indian state logotey jurikina asey. Nagland laga geographical position para etu ke drugs dhanda kora laga ekta main jaga banaikina asey. Bisi bhak illegal drugs tu India te Myanmar para gusey, Manipur ke par korey aro etu picheyte Assam, Karnataka aro Punjab nisna jag ate pungchey. Commissioner of Police, Dimapur, K. Sophie para koisey ki kanoon strict kuridiya para drugs dhanda kora khan ke drugs khan Nagland te direct anibole para rokhai. Hoilebi Nagaland tu dangor drugs dhanda te ekta par kurikina ja laga point hoisey.
Ekta dangor mondukh kuridiya laga mamla tu bisi manu khan para ‘Sunflower’(SF) koikina ekta sosta aro bisi addict kuridiya drugs cholai asey, khas kurikina school ja baccha khan. Sunflower drugs tu opiates(bikha komabole chola dawai) aro pharmacy te pa bustu jaiseki sleeping pills aro painkiller laga khatarnak mixture asey. Etu drugs ke jolaikina, naak para sungikina nohoilebi biji marikina cholai. Sunflower drugs tu sosta aro pabole asan hoija para chutu aro jawan manu khan etu bisi cholai. Enaa kurikina Nagland te drugs laga problem tu bari asey. Hoi law enforcement agency para drug-related jurum te arrest kuribole continue kuriasey. Hoilebi ekta aro gera aro lasting thakibole laga tarika olabole laga jarurat asey. Khali kanoon lagu kora, education aro therapy ke combine kurikina ekta kara kadam para hey Nagalnd tu drugs chola laga khilaf te larayi kuribo paribo aro rajya laga manu khan laga future healthy banabo paribo.
Add Comment