Ekta dangor aro expect nukurikina thaka twist te, India para tailaga naam tu duniya laga rock music record book te likhidisey jitya British band Coldplay para etu saal laga January 25-26 te kora ekta concert te manu attend kora laga records bhangaidisey. Etu concert kuntu te 200,000 opor fans para attend kurisey, etu para George Strait laga bisi lamba homoi para record bhangaikina thaka Texas concert ke paar kuridisey kuntu te 110,905 manu attend kurisey. Hoilebi, etu tu ekta musical milestone para bi barikina thakisey. Etu para India te ekta nutun economy takat aha laga signal disey- “concert economy” kuntu para India laga event khan huwa laga noksa ke bodli ani asey aro alag alag sector te economy(poisa len-den) barai asey. Coldplay laga Ahmedabad aro Mumbai te huwa shandar performance para fans khan ke khali ‘Lights Will Guid You Home’; ‘Fix You’ aro ‘Yellow’ nisna gana te jhumibole dikina pahoribole napara laga rati diya hey nohoikina etu para economic activity bi baraidisey. Hotel khan te bi pura occupy hoisey aro hotel laga daam tu asurit kuridiya level taak uthisey. Airplane laga bhara khan tu eman bisi uthijaisey aro rasta te saman bikri kora chutu-mutu beypari khan laga saman bi bisi bikri hoisey. Etu ekta event para economic ekdam baraidibole para tu nazarandaz kuribole impossible thakisey. Prime Minister Narendra Modi para bi etu achanak para huwa growth ke highlight kurisey. Modi para tailaga remarks te, “concert economy” laga barithaka importance ke acknowledge kurisey.
Meghalaya, kuntu tu India laga “Rock Capital” asey koikina jana jai etu state para India laga etu “concert economy” laga potential ke first recognize kuriasey. Meghalaya Tourism Youth Development Society (MTYDS) tu local economy barabole nimitey rock aro heavy metal music logotey thaka connection laga bhal istamal kuriasey. December 2024 te Bryan Adams laga concert aro etu laga olop homoi picheyte Ed Sheeran laga concert huwa para Shillong te expect nokora laga bhir anisey. Shillong laga rock scene tu ahibole homoitey Mr. Big, Lady Gaga, Green Day aro Post Malone nisna international icon khan laga performance para flourish hobole asey. Jitya Bryan Adams para December te Shillong te perform kurisiley, hotel laga rate tu ek rati te Rs 5,000 para uthikina Rs 60,000 hoisey. Room khan tu advance para pura book hoikina thakisey, restaurant bi pura full hoijaisey aro transport services khan bi bisi hoikina thakisey. Ticket khan tu ekghonta bhitor te bikri hoijaisey, ticket khan bulk para kinikina bikri kora manu khan tu ticket 5guna bisi daam para bikri kurithakisey. Enaka estimate kuriasey ki etu concert laga kamayi tu Rs 100 crore opor hoisey-kuntu toh ekta rati laga event nimitey ekta asurit kuridiya number asey. Live music event khan tu economic engine asey, kuntu para hospitality, transport, kha-luwa, cha aro juice khan, merchandise aro event management industries ke agey loijai asey. Duniyabhor te kora studies para confirm kurisey ki concert khan para consumer laga khorcha baraidiye. Music tu khali ekta art hey nohoikina etu tu economy ke baraidiya laga ekta karon hoisey. Etya International star khan India te ahitha homoitey, music aro market milija para ahibole saal nimitey India laga cultural aro financial noksa banai asey. Etu nimitey, ahibole din te, India tu rock star khan ahi thakibole laga jaga hobole asey.
Add Comment