Yogi Adityanath para chola Uttar Pradesh government para 2025 te Prayagraj te Maha Kumbh Mela organize kora te dhormic devotion aro political symbol laga fusion dikhibo pari asey. Etu saal Mahakumbh Mela tu January 13, 2025 te Paush Purnima te suru hoisey, kuntu ke ekta subh din maney. Aro February 26, 2025 taak chulibo. Etu event, kuntu ke planets, sun, moon ,star khan ekdam alag pattern te line up kora para mark kurisey, kuntu toh 144 years picheyte ekbar hoi, etu te 45 crore manu attend kurikina ekta nutun record set kurisey. Maha Kumbh Mela tu poila laga jamana te Hindu manu khan jama huwa laga ekta pavitra event asey aro etu toh hodai 12 years picheyte hoi. Hoilebi BJP government under te etu event ke bisi dhyan dikina sarkar chola laga display aro culture ke promote kora laga event te bodli kuridisey. Manu khan laga biswas dikha aro beybosta bhal thaka laga alava, etu Mela para Bharatiya Janata Party (BJP) nimitey taikhan laga vision ke ageybarabole aro political noksa te taikhan para raaj kuribole nimitey bisi dhyan para bana ekta stage hojaisey. UP government para infrastructure, security aro publicity te dangor investment kora para hosla aro izzat laga ekta noksa dikhaisey. Prime Minister Narendra Modi para etu event laga istamal tu media para bisi record kuri thaka dhormic Ganga snan(Ganga te dupki laga) te participate kuribole kurisey. Aro enaka kurikina etu event laga political(rajneetik) maksat dikhai asey. Hoilebi etu dangor event ke manu khan buhibole nimitey bana temporary tent te jui laga la khatarnak ghotna aro ekdusra ke chipaikina bhaga-bhagi kora te 30 manu murija laga darawna ghotna khan para biya kuridisey. Etu ghotna khan para enaka dangor event ke manage kora te size aro suraksa majotey chulikina ahithaka jhamila ke highlight kuri asey.
Yogi Adityanath, kun sadhu para chief minister hoijaisey, tai para nijor ke khali ekta administrator ekla nohoikina Hindu faith laga rakhwala laga position te bi rakhisey. Tai ceremony aro puja khan ke participate kurikina dhormic leader aro political leader etu duita laga image bi majboot kuri asey. Etu duita(dhormic aro political leader laga) role tu BJP laga Hindutva agenda logotey mili asey kuntu para dhorom ke politics logotey juri asey, election te laabh hobole nimitey. Government para kuwa hisap te, Kumbh Mela tu India laga pura homoi laga shaan aro dhormic tradition(parampara) asey. Media aro social media platforms(youtube, instagram, facebook khan) para government laga etu message ke barai-charaikina BJP para etu event organize kora laga tarika laga tarif kurikina etu dhormic identity ke indirect para desh laga pride logotey connect kuri asey. Taikhan para dibble mon thaka message tu clear asey: Asol Indian huwa matlab Hindu culture logotey connected thaka asey. Hoilebi etu message para religious minorities(Christian, Muslim, Sikh aro dusra non-Hindu dhorom laga manu khan) nijor ke ekdam alag nisna mehsoos kuriasey. Etu opor te, etu nazarandaz kuribo naparey ki ek side te etu Mela para Hindu values jaiseki ahimsa (matlab mara-mari nokora) khan celebrate kurisey hoilebi pura desh laga political khisa ke saisey koiley etu para sob dhorom laga heart te thaka inclusivity(matlab sob ke shamil kora) aro jokhom nidiya laga bhavna ke dur kuridiya nisna lagi asey.
Add Comment