‘Sacchayi (Hosa)’ tu ekta bhal character laga foundation asey, kuntu para imandari ke represent korey. Hoilebi ‘misa(lies)’ para larayi-jhagra aro doubt nohoilebi biswas kuribole napara ke jonom diye. ‘Sacchayi’ tu bodli anidibole para, azad kuridiya aro kitya bi change nohobole laga asey. ‘Sacchayi’ tu safa-safi dikha laga bawajut etu ke manu khan para bisibhak doubt korey, aro etu laga importance ke nazarandaz kuridiye. ‘Misa’ para olop homoi nimitey power hasil kora laga sapna dikhabo parey, hoilebi etu khan tu olop homoi nimitey hey asey aro ‘misa’ tu bahar ola picheyte nohoilebi asliyat janija picheyte barbad hoijai. Hoilebi, ‘sacchayi’ tu majboot aro nihilikina khara thakey. ‘Sacchayi’ logotey anyay laga khilaf te larayi kuribole laga aro change anibole laga takata sey. ‘Sacchayi’ tu sobsey shaktishali asey aro etu ke kun takat para bi bodli kuribo naparibo. Aro ‘sacchayi’ laga kotha te originality, imandari aro freedom laga weight bukhikina thakey. ‘Sacchayi’ tu bhal beybohar ekla nohoikina ekta meaningful aro imandar jibon laga foundation asey.
‘Hosa’ kotha ke kitya bi galat prove kuribole naparibo. Jinaka ‘sacchayi’ para bhalayi aro imandari ke represent korey etu nisna ‘misa’ para biya aro beymani ke represent korey.
‘Hosa’ kotha kuwa laga pavitrata aro ‘misa’ kotha kuwa laga biya tu kitya bi ekey somman hobo naparibo. Misa kotha para larayi-jhagra, doubt thaka,kotha change hoi thaka aro biswas kuribole napara hoija ke jonom diye. Etu laga opposite te, ‘sacchayi’ tu jibon te ekta dangor change anidiya aro azad kuridiya aro etu hisap te jibon bitabole nimitey ekta perfect goal asey.
Hoilebi monduk laga kotha tu etu asey ki ‘sacchayi’ ke bisibhak doubt para kamjor kuridiye . ‘Sacchayi’ tu sobsey shaktishali takat asey aro etu laga asar tu kityabi homoi jaithaka logotey komti hoikina najabo. Kun manu khan power pabole nohoilebi mashoor hobole nimitey taikhan laga character asani para bodli kuridiye taikhan tu biswas kuribola para laga layak nohoi. Nijor laga misa-misi image dikhabole laga kosis te, taikhan nijor laga kimat ke giraidiye.
‘Misa’ tu olop homoi nimitey hey thakibo parey. Jitya misa tu bahar olai, manu khan etu laga misa-misi takat laga sapna logotey girijai. Hoilebi ‘sacchayi’ tu sobsey shaktishali asey. ‘Sacchayi’ toh ekla, bahadur aro nihilikina khara korey. Enaka ekta Russian kahawat asey- ‘Ekta hosa kotha para duniya te hoithaka injustice(anayay) ke khotom kuridibole laga takat asey’. Etu kahawat para ‘hosa (sacchayi)’ laga dangor shakti aro authority ke dikhai asey. Etu para dikhai asey ki ekta chutu-mutu hosa kotha koidiya para galat kaam kora laga wajan bukhithaka tu halka kuridibo parey. Hosa kotha tu, kiman chutu hoisey koilebi aro eman dangor nohoisey koilebi, etu logotey galat laga samna kuribole aro jitijabole laga takat asey, misa tu kiman takatwar thakisey koilebi. Etu kahawat para amikhan ke etu yaad dilai asey ki ‘hosa’ tu kityabar chup nohoile nazarandaz kuridisey koilebi, etu logotey kitya bi khotom nohobole laga takat asey, kuntu logotey duniya te imandari wapas anidibole laga takat asey.
‘Sacchayi’ ke hunidisey koiley, etu para freedom anidibo. Etu nimitey, power laga kuntu position te thaka manu nohoilebi party laga kotha para bi sacchayi ke bodli kuribole naparibo. Kilemaney sacchayi nijor sobsey shaktishali asey.
Add Comment