Union Finance Minister Nirmala Sitharaman para saal te Rs 10 lakh taak tankha pa manu khan laga income tax maaf kuridibole announce kora tu spotlight te ahisiley. Etu tu India laga middle class nimitey ekta dangor rahat diya laga announcement thakisey. Etu announcement tu salary kha manu khan laga tax burden komaidiya laga ekta etihasik kadam asey koikina pura desh te khusi manai thakisey. Hoilebi, khusi manai thaka majotey, ekta important mamla samne ahikina khusi te badha anidisey. Ekta sabole mitha hoilebi asol te tita thaka dawai nisna, etu nutun tax relief tu bisi bhal nisna asey hoilebi etu toh government para 2020 te introduce kora nutun tax nyom under te hey chulibo, kuntu te bisi tax exemption(tax maaf kuridiya) aro deduction(tax komti kuridiya) khan hataidisey. Etu matlab, hoi Rs 10 lakh taak tankha pa manu khan para komti tax terabole lagibo hoilebi taikhan para HRA (House Rent Allowance), Section 80C deductions(PPF, EPF, life insurance khan nimitey), home loan interest deduction aro medical insurance deduction laga benedits khan claim kuribo naparibo. Etu opor te, etu income tax maaf kuridiya laga kadam utha tu mon bhal nohoikina ekta plan laga hisa thaka nisna dikhi asey. Kilemaney etu toh Maharashtra laga voter khan ke aim kurikina announce kora thakisey, kotey BJP para bisi dangor jeet hasil kurisey. Hoi, government para middle class khan ke tax para rahat dikina impress koraidibole laga kosis tu dikhawa nimitey kaam kurisey parey, hoilebi etu laga asol faida tu nijor nijor laga poisa laga halat opor te depend korey. Aro ekta serious mamla tu bank khan para crore opor account thaka manu khan para hodai din poisa luwa laga asey. Sitharaman finance minister huwa picheyte, India laga bank khan tu bank account thaka manu khan para extra poisa loi thaka nimitey mashoor hoikina asey. Etu tu sidha joborjosti poisa luwa nisna lagey. Etu extra charges khan tu chutu mutu first-service fees nisna dikhibo parey hoilebi picheyte transaction(poisa len-den kora) charges aro account maintainence fees bi astey-astey para add hoijai, aro enaka kurikina customer khan poisa laga dangor bojh bukhikina thakey. Bank khan para extra charges luwa tu bisi aam kotha hoijaisey ki bisi bank khan nimitey etu extra fees tu poisa kama laga ekta jariya hoijaisey. Etu para government ke bisi faida pungchai asey aro suspect nukurikina thaka account thaka manu khan ke looti asey. Ekta sobsey dangor chinta laga kotha tu etu bank khan para etu extra charges kiley loi asey etu khula-khuli janai nidiya tu asey. Bisi customer khan tu taikhan laga account te bisi fees katikina thaka laga bari te titya taak gom napaikina thakey jitya taak taikhan para bank statement te expect nukurikina thaka deductions(poisa katikina thaka) tu dikhey. Minimum balance te fine luwa aro SMS alert fees para loikina ATM para poisa laga charges aro UPI transaction(online te poisa transfer kora) fees taak, bank khan tu customer khan para poisa lobole laga bisi tarika olaisey. Bisi bank khan tu ekta limit opor te cash deposit kora, checkbook issue kora aro online banking facilities nimitey bi poisa charge korey. Kunba khan tu account te minimum balance maintain nokora nimitey bi fine loi, kuntu para income komti pa manu khan ke affect korey kun khan account te minimum poisa bi rakhibole napara laga halat te thakey.
Judi banking tu hosa bi sob manu nimitey aro manu laga subidha nimitey asey koiley, government para misa-misi bank service fees luwa laga against te kara action lobo lagey. Bank laga kaam tu transparent(khula-khuli) nuhuwa taak, manu khan tu taikhan laga seva kuribole nohoikina olta taikhan para lootibole nimitey bana system te ekta helpless victim hoikina thakibo.
Add Comment