Etu toh titya suru hoisey jinaka poila para hoikina ahi-asey, jitya manu khan bardash kuribole napara hoijaisey.
Khuzama laga student khan, National Highway 29 laga ekdam biya condition ke loikina gussa uthikina etu ke repair kuribole protest kurisey. Eku dangor speech nai, eku political slogan cholanai- aney simple demand rakhisey etu ratsa ke aha-juwa kuribole para laga layak banabole. Etu rasta te dangor-dangor chenta, mosto-mosto balu para bhorta hoikina thaka aro neglect hoikina thaka rasta tu pani gira season te pani jama hoikina thakey. Aro etu nimitey, taikhan protest kurisey.
Ek hapta picheyte, repair suru hoijaisey. Government agency, kun khan normally astey para action loi, taikhan tu etu protest laga jawab dibole majbur hoijaisey, kilemaney taikhan opor te right pressure dhalisey. Rasta bana nimitey responsible thaka agency, NHIDCL logotey action luwa laga alava dusra choice thakanai.
Authorities khan tu bisi protest khan ke hisap nathaka nisna kuridiye hoilebi etu wala protest tu kaam kurisey. Aro etu para prove kurisey ki change aha tu possible asey. Manu khan kiman bar protest kurisey, hala-gula kurisey aro petition likhisey hoilebi etu khan bisi bar ignore hoijaisey. Nagaland ekla te, bisi rasta khan nuchuikina thaki-asey, kiman busti khan etya tak bi chutu-mutu service nimitey rukhi-asey, kiman kosom khaikina pahorijaisey?
Rasta thik hoijaisey koiley student khan school te taikhan laga theng ke risk te nadhalikina school pungchibo paribo. Etu matlab toh, chutu aro agey baribole dukh kurithaka business khan para saman khan aro asan para ana-loija kuribo paribo. State government para ekbar nimitey ekta problem ke dhyan te rakhikina etu te kaaam kurisey. Aro enaka ekbar hoisey matlab, etu aro bi hobo parey.
Government authorities para enaka action loikina eku meherbani kora nohoi. NHIDCL para etu action tu morom khaikina nohoilebi nijor laga zimidari bujikina luwa nohoi. Taikhan opor te pressure dhala aro taikhan majbur huwa nimitey etu action luwa laga asey. Etu tu taikhan laga duty asey, kuntu ke taikhan lamba homoi para neglect kurikina ahi-asey. Manu khan para protest kora picheyte government para rasta bana laga kaam te action luwa tu manu khan ke gift diya nohoi; olta etu kaam tu taikhan para protest kuribole agey para kurilobole lagisiley. Government laga manibole mushkil thaka sachayi tu etu asey- ki kaam automatic para hoijabo lagey etu kaam nimitey hodai fight kuribo lagijai.
Protest tu hosa-hosi aro sahi tarika para kurisey koiley, power te nathaka manu khan nimitey etu toh akhri hathyar asey. Kityabar protest kora tu mushkil, jhamila laga kaam hobo parey hoilebi etu toh jaruri asey.
Ahibole homoitey dusra protest khan hobo aro bisibhak protest ke authorities khan para nazarandaz kuridibo. Rasta khan bhanga thakijabo, school bon thakijabo, hospital khan doctor nathakikina chulibole continue kuribo. Etu toh enaka system laga asliyat asey kuntu toh titya hey kaam korey jitya taikhan opor te pressure dhaley. Hoilebietu mamla te amikhan sikha lesson tu amikhan kiman bar fail hoi etu nohoikina kinaka kityabar amikhan fail nohoi etu laga bari te asey. Ekta rasta repair kora para sobkuch thik kuribole naparibo hoilebi komsikom ekta rasta tu biya condition te nathaka hoisey. Aro etya nimitey etu kaafi asey.
Add Comment