Dimapur te aji kali ekta notun aru dangor problem uthi ase, manu khan footpath opor te gari cholai laga. Juntu jagah pedestrians, baccha khan, bura, buri aru disabled manu karone banaise, etu bhi aji kali two wheeler aru four wheeler khan cholai kena road bonai dishe. Etu khali traffic jam time te nahoi, normal time te bhi dekhi jai ase.
Footpath to banai se pedestrians khan karone, jate tai khan safe thakibo pare, road side te danger face na kuri bole. Kintu jitiya bike aru scooter khan etu walk kuribo jagah opor te cholai thake, etu to illegal ekla nahoi kena, bishi deadly hoi jai. Etya to footpath opor birai thaka bhi risky hoise. Kunba manu to narrowly bachi ase, kunba time te to jump kuri kena bachi ase. Kintu jodi etu continue hoi thakele, ekdin to etu “near miss” to accident te convert hoi jabo.
Etu niyom para dekhai ase ki Dimapur te traffic discipline pura breakdown hoise, aru law laga bhi eku hisap nathaka hoise. Traffic police to kunba jagah te ekla thake, nahoile bishi over streched hoi thake. Juntu manu khan rule break kure, tai khan punishment na pai. Tate manu buji jai: “Ki kuribo mon ase, kuribi.” Aji jodi etu problem stop kura nai koila, agete jodi Dimapur modern city hobo mon ase koile, etu culture ke hata bole lagibo.
Etu behavior bhi dekhai ase ki maximum drivers khan selfish hoise. Sob manu hurry te ase, hoilebi etu mane nahoi ki dusra manu khan ke danger te rakhile bhal ase. Personal convenience karone public safety ke side line kura to ekta egoistic mentality hoise. Etu dikhai dise ki civic sense aru empathy nai.
Dimapur laga rasta, age para pressure te ase. Rasta khan narrow ase, kunba jagah te pothole pura full ase, aru jam sob time thake. Vendor khan footpath occupy kure, gari khan road side te park kuri thake. Etu sob milaikena road space to kom hoise. Kintu solution to footpath ke use kuribo lage te nahoi. Solution ase: traffic system ke improve kura te, road infrastructure upgrade kura te, aru discipline para drive kura te.
Responsibility khali police karone nahoi, sob citizen khan ke bhi ase. Traffic rule to suggestion nahoi, etu law ase, public safety karone. Public ke bhi report kuribo lage jodi dekhe ki kunuba footpath opor te gari cholai ase. Traffic police khan strictly fine dibo lage, repeat offender laga license suspend kuribo lage.
Awareness campaign cholabo lage; school, college, driving school sob jagah te sikhai dibo lage ki footpath opor te driving kura bishi danger ase. CCTV camera laga use bhi barabo lage major junction te, punishment dibo karone aru manu ke enika kaam nakuribole.
Footpath to ekta symbol ase, safe walking city karone. Etu public jagah ase, walk kuribo karone, drive koribo karone nahoi. Dimapur ekta safe, clean aru disciplined city hobo pare, kintu etu karone public space ke misuse kura to bondh kuribo lage. Etya time ahise, footpath ke tai laga original owner, pedestrians khan ke wapas dibole.
Add Comment