Indonesia, 3 June : Duita Olympic medal jitise PV Sindhu aru men’s doubles pair Satwiksairaj Rankireddy aru Chirag Shetty Indonesia Open Super 1000 badminton tournament laga pre-quarterfinals te reach korise, kintu Lakshya Sen first round te eliminate hoise Tuesday din.
Sindhu laga performance ekdom dangor thakise, juntu tai Japan laga long-time rival Nozomi Okuhara ke haraise 22-20, 21-23, 21-15 score te, ekta one-hour 19-minute laga women’s singles match te.
Lakshya Sen, juntu 2021 World Championships bronze medalist ase, hard fight dise kintu world number two China laga Shi Yu Qi logot 11-21, 22-20, 15-21 score te 65-minute laga match te hari jaise. Shi originally event te world number one thakise, kintu Tuesday te match hobo pora turant updated ranking te second spot te slip kori jaise.
Sen back injury pora recover kori ahise, juntu karone last week Malaysia laga tournament te part loi nohoi. Tai second game te 11-17 pora pichi thaka bhi comeback kori, ekta match point save kori 22-20 te game jitise aru match ke decider te loijai. Kintu third game te Shi control wapis loi match jeet lobo pare.
Dusra side te, HS Prannoy bhi USD 1,450,000 laga tournament pora eliminate hoise. 2023 World Championships bronze medalist Prannoy Indonesia laga Alwi Farhan logot 17-21, 18-21 score te hari jaise. Pichete Satwik aru Chirag Indonesian duo Leo Rolly Carnando aru Bagas Maulana ke 18-21, 21-18, 21-14 score te harai round of 16 te entry loi jaise. Itu match 67-minute tak chali thakise
Add Comment