Jotsoma, 19 June 2025: TaFMA Excellence Awards 2025, June 19 tarik-te Jotsoma, Kohima laka Regional Centre of Excellence for Music & Performing Arts (RCEMPA) te manai korishe. Etu program Task Force for Music and Arts (TaFMA) pora organize kuri thaki, juntu Naga artists khan ke celebrate kure, jiman national aru international level-te bhal result ane.
Program laka main highlight to world-famous music composer Dr. A.R. Rahman pora state ke gift kuri diya grand piano laka unveiling aru 25th Hornbill Music Festival laka Coffee Table Book release kora ase.
Nagaland laka Chief Minister Dr. Neiphiu Rio special guest hisap-te thakishe. Tai Naga artists khan laka talent aru hard work ke praise kurishe aru Dr. Rahman ke bhal pa janai dishe. Dr. Rio koishe TaFMA laka role hoishe Naga culture promote kora aru music aru arts laka maddom-te youth khan karone job opportunity create kora.
Advisor Abu Metha bhi koishe Naga artists khan global recognition pai ase aru Nagaland laka creative economy-te ekta important role play kuri ase.
Dusjon artist award paishe, jiman khan majot Hito Kiho ke Ultimate Achiever Award dishe. Baki winners khan Fifth Note Band, Alobo Naga, Trance Effect, etc ase.
Top performers khan laka musical performance bhi thakishe. Dr. Hovithal Sothu, Project Director, Vote of Thanks dishe aru sponsor Toyota logot sob participants ke appreciate kuri se.
Add Comment