Aamir Khan laga chokra Junaid Khan laga first film ‘Maharaj’ Netflix te release hobole asey

New Delhi, May 29 : Aamir Khan laga chokra Junaid Khan tu screen te tailaga acting debut nimitey pura tayar asey. Tailaga first film laga naam ‘Maharaj’ asey aro etu tu direct Netflix te olabole asey. Netflix para Wednesday din te social media te jaikina etu film laga first teaser poster logotey release date bi announce kurisey. Etu film laga poster ke Netflix laga official handle te share kurikina likhisey, “Ekta shaktishali manu aro ekta bhoi nakha journalist majotey sacchayi nimitey larayi. Hosa events te based asey- Maharaj tu 14 June te release hobole asey, khali Netflix te!.” ‘Maharaj’ te Jaideep Ahlawat, Sharvari Wagh aro Shalini Pandey ke bi dikhibo paribo. Aro etu  film tu 1862 Maharaja Libel case para inspire huwa laga asey. Etu film te Junaid tu Karsandas Mulji laga role play kuri asey, kun ekta journalist aro samaj te bodli ana manu aro maiki khan laga haak nimitey aro samaj te bodli anibole nimitey kaam kora laga nutun soch ana manu asey. Etu film te tai Mumbai laga Elphinstone College laga student aro scholar-leader Dadabhai Naoroji laga student nisna thakisey. Tai para mota murija maiki khan ke aro nutun shaddi kuribole dibole likhisey, dukh paikina thaka manu nimitey khara kurisey aro samaj te bodli ana laga seed(gutti) lagaisey. Netflix aro Yash Raj Films laga ‘Maharaj’ te Mulji laga bahaduri kaam dikhabo. Libel case logotey adharit thaka etu film para Junaid Khan ke audience ke introduce kuribole asey. Etu film ke filmmaker Siddharth P Malhotra para direct kurisey. ‘Maharaj’ picheyte, Junaid ke next Sai Pallavi logotey ‘Ek Din’ film te dikhibole asey.