AAP Assam para ADRE exam laga security ke sawal kurishey

Guwahati: Assam unit laga Aam Aadmi Party (AAP) para Assam Direct Recruitment Examination (ADRE) laga exam de procedure aro security check laga complain, aro jinto exam paper khan leak hoishey, edu laga kotha de sawal kurishey. National Human Rights Commission (NHRC) de edu party para formal complaint ekta likhishey. Exam laga neom biya kura nemedey likhishey. “Bishi manu security check laga opor de complain kurishey ke maiki khan laga opor de biya para choi kina search kura laga. Security laga naam para maiki khan ke khushi napa laga jaka de choi kina seher kuripo dishey. Jinto tai khan laga dignity biya kuridishey aro tai khan nemedey sorom ekta takishey”. Enika koishey edu party para. “Edu security check kura manu khan kinika maiki khan ke respect natakhe kina choishey aro ekta professionalism natakha de dikhe pai asey ke edu conduct de standard operating procedure (SOP) ekta natakha toh. Enika biya adaat khan loi kina manu laga opor de nahoa laga kaam kura toh ekdum lopo napara laga khota asey aro edu khota de joldi action lopo lagey”. Enika koishey. Edu biya kaam kura laga opor de Party para koishey ke exam paper khan leak kura toh examination laga process de pe ekta biya neom chula nishina dikhe pai asey koishey. Party para aro koishey ke technological problem karne examination de bishi chamela olaishey. Exam lopo time de statewide internet bon takishey. Edu para student khan bishi exam loa laga jaka toh bisarepole duk paishey. Google Maps aro alak internet service khan napa karne duk paishey.