New Delhi, October 23 : Ekta jana mana Indian actor aro Bharatiya Janata Party (BJP) laga bisi lamba homoi para member thaka Gautami Tadimalla para Monday din te BJP party para regisign kurisey koikina announce kurisey. October 23 te laga tarik dikina thaka letter te, Tadimalla para tailaga nijhi zindigi te dukh jheli thaka homoitey BJP party laga leader khan para support napa nimitey apsoos janaisey.
Tadimalla, kun para 25 saal agey te BJP join kurisey tai para picheyte tailaga letter te janaisey ki tai tu tailaga zindigi laga ekta muskil ghari te asey aro enaka homoitey tai para expect kuri thaka hisap te BJP aro BJP leader khan laga side para support pa nai. Tai para iljam lagaikina enaka koisey ki BJP party laga bisi member khan para ekjun manu ke active para support kurisey kun para taikey dhoka disey aro tailaga zindigibhor laga kamayi te cheat kurisey.
Tadimalla para enaka koisey, “Ami tu zindigi laga enaka point te asey jitya ami laga chukri aro ami tu logotey eku laga kami nathakikina, suraksit aro secure thakibole lagisey hoilebi asurit para ami etu janibole parisey ki Mr. C Alagappan para ami kea mi laga poisa, property aro document khan para beydakhal kuri disey.”
Tai para koisey, “Mr. C Alagappan para 20 saal agey tea mi laga vulnerability aro isolation dikhikina ami ke approach kurisey. Kilemaney ami tu khali ama baba nathaka baccha hey nohoikina ekta nutun jonom huwa laga single(mota nathaka) ama bi thakisey. Tai para nijor ke aro tailaga parivar kea mi laga zindigi te ekta morom kora dangor manu laga roop te gusaisey. Ami tu 20 saal agey te enaka situation te thakisey kotey ami para taikey ami laga bisi mati laga bikri kora aro documents khan laga zimidari disey. Aro ami para aji kali hey etu janibole parisey ki tai para ami aro ami laga chukri ke tailaga parivar laga hisa hobole swagat kora laga natak kurikina ami logotey fraud kurisey.”
Tadimalla para tailaga letter te, nyay pabole nimitey dukh kora laga detail jankari disey aro janaisey ki tai para desh laa kanooni process ke follow kurisey aro bisi complaint file kurisey hoilebi etu process khan ke misa misi lamba tani asey.
Etu actor para politician hoija Gautami para tailaga BJP party para ekdam support napa laga bi iljam lagaisey. Aro koisey ki BJP laga bisi senior member khan para FIR file huwa picheyte bi juwa 40 din para Mr. Alagappan ke nyay hobole para rokhable aro polabole modod kuri asey.
Gautami Tadimalla para likhisey, “ Hoilebi, ami para etya tak bi akha kuri asey ki amilaga Chief Minister, ami laga police department aro ami laga judicial(nyay kora) system tu thakibo aro amike ami para bisari thaka laga nyay tu dibo.”
Tai para last te koisey, “Ami para etu aji resignation letter tu ekdam mon bikhaikina aro monduk para likhi asey, hoilebi bisi firm resolve para. Ami tu nota nathaka maiki aro ekta single ama hoikina nijor aro ami laga baccha ke nyay dilabole nimitey larayi kuri asey.”
Add Comment