Adele para announce kurisey ki tai music para break luwa tu bisi lamba hobole asey

HT Entertainmenment Desk, September 01 : Hollywood singer Adele logotey etya nutun gana banabole laga eku plan nai. Tai para Munich, Germany te tailaga 10 show engagement laga akhri shaam te Saturday din te stage te thaka homoitey music para break lobole laga bari te koisiley.  Tai para bhir ke koisey, “Ami para etya 10ta show kuribole asey. Aro etu picheyte ami apni khan ke bisi diri nidikhibole asey aro apni khan tu amilaga mon te apni khan nimitey morom bukhikina thakibole asey. Etu picheyte ami ekta damgor break lagia sey. Aro ami dusra kaam khan kuribole mon asey. Khali olop homoi nimitey.” Fans kahn tu Adele laga etu announcement hunikina monduk hoijaisey. Ekjun fan para “Amikhan apni laga gana khan nimitey rukhibo!” koikina comment kurisey. Etu announcement tu first time juwa moina te olaisiley, jitya tailaga Rich Paul logotey engagement hoisey. Adele aro Rich ke first time July 2021 te link kurisiley, jitya taikhan duijun ke ekelogotey NBA Finals game saithaka dikhisey. Adele laga akhri album tu ‘30’ thakisey, kuntu November 2021 te release hoisiley. Etu album tu duniyabhor para  bisi bhal response paisey.