Agencies, 01 October: Wednesday te Athletics Federation of India (AFI) para etu sal laga national championships toh COVID-19 pandemic nemide cancel korise. Etu para season toh eku competition naloi kena kothom hoise.
Etu agae AFI para August 28 direk season toh September 12 direk te suru koribole nemide deri koridebole fesla kora thakise kelay koile duniya te health chamela nemide. Etu season te etiya tak eku athletics competition nai.
National throws open championships toh October 26 aro 27 direk Patiala te lobo aro etu toh etu sal senior level te khela ekala event hobo. Aro November te olob zonal events aro December moina Vijaywada te national youth championships toh tusara competitions ase etu sal lobole nemide.
AFI be next season laga Olympics qualification toh athletes nemide kaam laga hobole bhabona kori ase aro aha sal February 12 te first Indian Grand Prix toh Thiruvananthapuram te suru kora thakibole ase.
Etu bechide second aro third Grand Prix events toh February 19 aro 27 direk Thiruvananthapuram aro Patiala te lowa thakibo.
2021 Federation Cup Senior National Championships toh Patiala te March 10 direk para 14 direk tak lobo. Etu toh AFI para calendar deya hisaab te ase.
National Inter-State Senior Athletics Championships toh Bengaluru te June 25 para 29 direk tak lobo.
Calender te be first National Under-23 Championships toh New Delhi te August 24 para 26 direk tak lobole ase.
Sob Indian Grand Prix events, the Federation Cup aro National Inter-State toh Olympic qualifying events ase.
Add Comment