African Swine Fever  para Manipur te Rs 30 crore laga loss kurisey

Imphal, October 30 : Manipur te bari thaka African Swine Fever (ASF)(gahori khan laga bimari) para rajya laga gahori farm khan ke bisi biya para affect kurisey.

Manipur laga gahori pala manu khan para janaisey ki etya tak  bisi joldi spread huwa bimar (African Swine Fever)  para rajya te Rs 30 crore maan laga loss anidisey kilemaney etu bimari para affect huwa gahori farm laga 90% gahori tu etu bimari para murijaisey.

Manipur veterinary aro animal husbandry department laga hisap te, Imphal West, Bishnupur, Imphal East, Ukhrul, Thoubal, Kakching aro Kamjong district khan te African Swine Fever(ASF) pungcha laga report olaisey.

Imphal West district kuntu laga Iroisemba koikina ekta jag ate thaka  Central Agricultural University (CAU) laga ekta gahori farm te ASF bimari first ola laga report olaisey etu district para aro Lilong Chajing Mamang Leikei, Konthoujam Maning Leikai, Loitang Khunou, Luker aro Sairemkhul jaga khan te aro 5ta farm te etu ASF bimari pungcha tu dikhisey.

Manipur Progressive Pig Farmers Association (MAPPFA) laga joint secretary, L Bidyasagar para Sunday din te Manipur Press Club te huwa ekta media conference te koisey ki taikhan para sob bikri kuribole nimitey pala gahori laga farm khan te gahori mora laga jankari paisey.

Etu bimar para affect huwa district khan laga majotey, Ukhrul te sobsey bisi gahori etu bimar paikina asey aro etu bimar para murisey. Aro koisey ki Mnaipur laga 5ta plain district laga gahori palikina bikri kora manu khan laga Rs 30 crore maan loss kuridisey.

Manipur Progressive Pig Farmers Association(MAPPFA) laga leader khan para manu khan ke jitya Manipur VAH department laga official khan para gahori khan ke moraidibole nimitey  taikhan laga jaga ke visit kuribo etu homoitey taikhan logotey cooperate kuribole     request kurisey.

African Swine Flu (ASF) laga Deputy commissioner para etu koikina ekta notification release kurisey ki utu gahori farm kotey para ASF bimari ola laga report olaisey etu gahori farm khan ke epicenter(bimar ola laga asli centre) declare             kuriseyaro etu jaga para 1km dur area ke infected zone aro 10km dur jaga ke surveillance zone declare kurisey.

Notification te etu bi koisey, infected zone khan te sob gahori ke moraidiya laga kaam tu Manipur VAH department para kuribo lagibo aro bimari paikina thaka nohoilebi paisey koikina suspect thaka farm khan te chola saman aro gari khan ke bi eku nyom nathakikina aha juwa kora para rokhabo lagey.