Ahmedabad: LPG Cylinder blast howa te 9 jun manuh morishe

AHMEDABAD: Gujarat’s Ahmedabad city te LPG cylinder room te leak howa nemite jui olaikena 4 jun bacha aro dosura 5 jun besi beya para jui te julishe koikena police official para janaishe. Etu incident te 8 jun labourers aro tai khan laga family members khan toh elaj kora samai morishe aro dosura 1 jun aji morishe. Etu manuh khan sob toh Madhya Pradesh para ase koikena khobor para janaishe. “LPG cylinder te gas leak hoikena blast howa te jui te 10 jun manuh pithor te bacha aro maiki manuh khan jui te besi beya para julishe. Etu incident te 9 jun manuh itya dak te morikena ase. Tai khan toh civil hospital te elaj kori thaka samai mora ase,” koikena ,” Aslali police station laga inspector,  PR Jadeja para janaishe. Thursday din tin(3) jun manuh toh elaj kora samai morishe, 5 jun Friday din morishe aro aji pujur 1 jun morishe, koikena tai para koishe. Etu labourers aro tai khan laga ghor manuh toh horu room ekta te komai thaka samai tai khan laga gas cylinder toh leak kora soruh hoishe. Etu samai ghor osor manuh khan para doorja te marikena alert korishe, etu samai labourers 1 jun othikena light kulishe aro light para spark kora te gas toh putishe, koikena dosura police official para janaishe. 10 jun jokom powa manuh pithor te ghor osor manuh kaun para khobor thiboli jowa toh be samil ase aro tai khan sob ke civil hospital te elaj nemite loikena jaishe. Mora manuh laga nam toh Rampyari Ahirwar (56), Rajubhai Ahirwar (31), Sonu Ahirwar (21), Seema Ahirwar (25), Sarju Ahirwar (22), Vaishali (7), Nitesh (6), Payal (4), and Akash (2) aro tai khan sob toh Madhya Pradesh, Guna district para thakishe, koikena inspector para koishe. Mr Jadeja para koishe ke, tai khan laga body toh nejor bosti, Madhya Pradesh te putaishe koishe.