Aizawl te lockdown aro 7 din othaishe

May 15, 2021. Aizawl aro dosura district headquarters te May 10 darik te lockdown thaka toh aro 7 din nemite othaishe, desh te bemari komti koribo nemite ase koishe. Friday din te government para order te koishe ke, itya jai thaka complete lockdown toh May 17 darik (4am) te kotom hoboli thaka toh aro May 24 darik 4 am dak othaishe. “besi tangor neum jolaile thakile be COVID-19 positive cases toh othi-ase, etu nemite authority para total lockdown toh bemar komti koribo nemite othai ase,” koikena order te janaishe. Capital aro dosura district headquarters/towns osort e boha manuh khan ghor pithor te thakina bahar te napiraboli koishe. Parthana kora jaga, educational institutions, public parks, picnic spots, movie theatres, gymnasiums, community halls, and restaurants, shopping complexes, malls, business dukan toh etu samai state pura te bondh thakibo. Etu oper te government offices aro dukan te essential saman, vegetables aro meats dukan toh Aizawl aro dosura district headquarters te complete lockdown thaka samai bondh thakibo. Dukan te essential commodities, vegetables aro meats dukan toh Tuesday aro Friday din te kulibo aro village level task force khan para vegetable markets/dukan toh nejor jaga te bonaboli order para janaishe. Hoilebi, economic aro agriculture kam nehina toh Aizawl aro district headquarters bahar te thaka toh Covid-19 hoshari neum koribo. State capital aro district headquarters/towns te rati curfew toh 7 pm para 4 am dak thakibo. Government offices aro commercial banks toh state capital aro dosura district headquarters bahar te Covid-19 hoshari neum te kulibo koishe. Friday din Mizoram te 201 Covid-19 cases thurishe, etu melaikena state te bemari cases toh 8,377 hoishe. Etu samai, Friday din alag-alag Covid-19 care centres para 90 manuh discharged hoishe. Itya dak te active cases toh 2,060, ase aro 6,294 manuh bemar bhal hoishe. Mizoram te bemari para 23 manuh morikena ase.