April 24,2021. Aizawl toh railway map te tui(2) saal neshina thaka beche thikiboli koishe. Itya Mizoram-Assam border, Sairang aro Bhairabi broad gauge railway line toh 51.38 km lamba bonai thaka toh December 2023 saal dak te kotom hoboli ase koishe. Etu khobor share kora te, Friday din te Northeast Frontier Railways (NFR) laga official para koishe ke, construction kam toh alag-alag stage te jai-ase aro kam koriboli toh final hoishe. Sairang jaga toh Aizawl para 200 km neshina jaikena ase aro ekla Lengpui airport para 12 Km neshina thur ase. Officials para koishe ke, mathi-kam 89.55% aro tangor bridges 37% aro horu bridges73.26% kam kotom hoikena ase. Tai koishe,tunnels kam toh 21% neshina kotom hoikena ase. Etu rasta te 32 tunnels (12.67 km total length), 16 cover tunnels (2.58 km total length) aro 51.38 km lamba railway rasta ase aro etu para Kolasib district aro Aizawl districts laga Thingdawl aro Tlangnuam Blocks te perabo koishe. Aro 55 tangor bridges pithor te 6 lamba bridges laga ocha toh 70 m(sobse lamba 101.4 m) ase aro 87 horu bridges ase aro rasta oper te 5 bridge aro rasta neji te 8 bridges ase koishe. Bairabi jarikena, railway line toh 4 stations Hortoki, Kawnpui, Mualkhang aro Sairang hoikena jabo. Friday din te Mizoram chief secretary Lalnunmawia Chuaungo para alag-alag kam jai thaka BG line toh visit korishe aro railway officials khan logot be kotha korishe. Tai para bhal kotha koishe aro NFR officials logot kam toh joldi para kotom koriboli janaishe. Chuaungo para koishe ke, jodi kam kora te konuba dukh hoile, state government para sai thiboli janaishe. Tai para besas te koishe, ketai etu kam toh kotom koribo, state te economic pasikena thaka toh kolibo koikena janaishe. Sairang-Bairabi broad gauge line nemite Foundation stone toh Prime Minister Modi para November 2014 saal te kulishe. Etu project toh 2015 saal te soruh hoishe aro 2018 saal te kotom hoboli thakishe koishe.
Aizawl: Tui(2) saal beche railway map te thakibo
