Akshay Kumar: ‘Amilaga film kamyab nuhuwa dikhikina Bollywood te manu khan khusi asey’

New Delhi, July 14 : Akshay Kumar laga latest  film ‘Sarfira’ tu expect kora nisna release huwa din te bhal para perform koranai. Etu film release hobole ageyte, Akshay para Galatta Plus’ Baradwaj Rangan ke interview disiley. Aro koisey ki Bollywood te manu khan khusi asey ki tailaga film bhal para nuchuli asey. Akshay Kumar para enaka koisey, “Jitya 3ta, 4ta, 5ta film kamyab nohoi manu khan etu sabole khusi pai. Bollywood industry laga manu khan tailaga picture cholanai koikina khusi hoijai.” Etu picheyte tai para Bade Miyan Chote Miyan aro Samrat Prithviraj laga nakamyabi laga bari te kotha kurisey. Aro koisey ki Samrat Prithviraj tu etu nimitey fail hoisey kilemaney creenplay te kiba golti thakisey. Akshay Kumar tu Bollywood laga ekta alag alag role kuribole pariya actor asey. Kun action para loikina comedy film tak ekey grace logotey eman bhal para kurikina ahi asey. Akshay tu film te kaam kurikina etya 30 years opor hoisey. Tai ke etya Bollywood laga sobsey successful manu majotey ekta consider kuribo parey.  Hoilebi dusra celebrity khan nisna Akshay bi ekta chutu background para ahisey. Akshay para koisey ki jitya tailaga parivar Delhi laga Chandni Chowk para Mumbai te shift kurisey, taikhan ekta chutu room thaka bhara ghor te buhi thakisey kuntu laga bhara tu Rs 100 taka thakisey. Chandni Chowk te taikhan 24 manu ekey ghor te buhi tahkiey. Taikhan ekey room te ghumai thakisey. Morning te taikhan exercise kuribole utha homoitey  bahar jabole sob manu ekjun ekjun opor te jump korey. Akshay para agey barikina koisey ki tai Mumbai seher te tailaga parivar logotey first pungcha homoitey tai Mumbai laga Sion Koliwada te boha suru hoisey. Tai koisey ki utu homoitey ekdin bi enaka thakanai jitya taikhan hasi dhamali kurikina nathakey. Etya jabki taikhan logotey poisa asey kityabar taikhan monduk hoikina thakey. Hoilebi utu homoitey monduk hobole eku thakanai.