Akshay Kumar para ‘Selfiee’ film nimitey eku fee luwanai

Mumbai, March 23: 2022 te, Bollywood star Akshay Kumar para box office te tailaga film ke hit banabole paranai. Tailaga film Raksha Bandhan aro Ram Setu tu flop hoijaisey. 2023 laga suruwat bi tai nimitey bhal thakanai, tailaga film Selfiee tu box office te fail hoisey. Recently, Pinkvilla logotey kora ekta interview te, Selfiee film laga producer Prithviraj Sukumaran para Akshay para etu film karney kiman poisa charge kurisey etu janaisey. Prithviraj para koisey ki Akshay tu etu film karney eku fees luwanai. Prithviraj para enaka koisey, “Ami Akshay Kumar sir logotey ekta film produce kurisey. Tai ektaka bi luwanai. Tai para khali enaka koisey,’Etu film para poisa kamaisey koiley hey ami amilaga poisa lobo.’ Etu film tu bhal perform koranai aro tai(Akshay) para ek taka bi luwanai.” Selfiee picheyte, Akshay Kumar laga film OMG 2 toh box office te success hoisey. Hoilebi, tailaga next 4ta film tu aro bi profit kamabole paranai. Raj Mehta para direct kora aro Dharma Productions aro Cape of Good Films para produce kora comedy-drama film ‘Selfiee’ tu Malayalam film Driving Licence laga remake thakisey. Etu film te Akshay Kumar aro Emraan Hashmi main role te thakisey. Aro Nushratt Bharuccha, Diana Penty, Mahesh Thakur, Meghna Malik, Abhimanyu Singh aro Adah Sharma supporting role te thakisey. Etu film tu audience laga side para mixed(bhal-biya milaikina) aro negative review paisey aro pura duniya te khali Rs24.6 crore kamaikina box office te fail hoisey.