Ambani Bomb Scare Case te aro 2 jun thurishe

Mumbai: Industrialist Mukesh Ambani laga ghor osor SUV gari te bomb rakina thaka aro businessman Mansukh Hiran ke morai deya case te National Investigation Agency (NIA) para aro tui(2) jun manuh ke thurishe, koikena officials para khobor toh janaishe. Tai khan ke Mumbai district osor Gaimukh jaga te investigation nemite luikena jaishe, officials para koishe. Mumbai laga special court para tui(2) jun accused Santosh Shelar aro Anand Jadhav ke NIA’s custody te June 21 darik dak rakiboli koishe. Etu samai NIA officer para koishe ke, Shelar aro Jadhav ke June 11 darik Mumbai osor Malad jaga para thurishe. “etu laga case te tai jun para Ambani laga south Mumbai ghor osor te bomb toh SUV gari te rakishe, koikena NIA officer para janaishe. Central agency para aro suspects kora te Mansukh Hiran, Thane-based businessman ke morai deya te kam korishe aro SUV gari toh tai laga hath para chor hoikena February 25 darik te Mukesh Ambani laga ghor osor te bomb raki thishe, official para koishe. Mansukh Hiran toh March 5 darik Thane te morikena thakishe. Shelar toh Malad te Slum Rehabilitation Authority (SRA) building project te samil ase aro tai toh purana ‘encounter specialist’ police officer logot connections ase koikena khobor lowa manuh para news agency Press Trust of India logot janaishe. Ketai tai khan ke court osor te loikena jaishe, accused ekta para retired police officer laga nam toh olaishe, khobor para aro news agency Press Trust of India logot koishe. Mumbai police laga Assistant inspector, Sachin Waze ke kam para olai-thishe aro tai toh etu case te main manuh ase aro thurishe. Olop din akhe te 4 jun policemen pithor te tin(3) jun toh officer ase aro 1 jun constable aro 1 jun toh cricket bookie ase, tai khan sob thurikena ase. Maharashtra Police para tuita(2) case sai thaka toh olop din beche NIA logot thikena ase koishe.