Amitabh Bachchan para koisey ‘KBC’ season 16 te interesting bodli anisey

New Delhi, August 04 : Mashoor star Amitabh Bachchan, kun ‘Kaun Banega Crorepati’(KBC) laga 16^th season host kuribole asey, tai para Sunday din te koisey ki etu mashoor quiz(question huda) show laga nutun season te  kiba alag dikhibole asey. KBC laga latest season tu Sony Entertainment Television te August 12 para ahibole asey. Etu show tu Monday – Friday 9pm te ahibo. Online te kora ekta lamba post te Amitabh para likhisey ki etu show para contestant khan ke khali cash prize jitibole hey nohoikina taikhan laga personal kahani share kuribole laga bi moka dibo. Etu show te nutun changes aha majotey ekta change tu ‘Dugnaastra’ asey. Aro etu laga through para contestant khan ‘super sawaal’ te sahi jawab dibole parisey koiley taikhan para jita kimat tu double hoijabo. Hoilebi shart tu etu asey ki, etu  super sawaal te candidate khan ke sahi jawab chunibole nimitey  option nidibo. Amitabh Bachchan para ‘KBC’ tu etu show 2000 para, suru huwa homoi para host kurikina ahi asey . Khali 2007 te ola Season 3 ke charikina. Season 3 tu superstar Shah Rukh Khan para host kurisiley. Amitabh ke recently Kalki 2898 AD film te dikhisiley kuntu ke Nag Ashwin para direct kurisey. Etu film tu duniya laga box office te Rs 1000 crore opor kamaisey.