Anasuya Sengupta para Best Actress Award paisey

New Delhi, May 28 : Anasuya Sengupta para Cannes Film Festival te Best Actress award jitiya first Indian hoikina desh laga naam uccha kuridisey. Anauya para etu award tu ‘The Shameless’ film te Renuka laga role kora nimitey jitisey. Anasuya para instagram te nijor announce kurisey ki tai award pa din te panda kapra tu tai para ekta flea market para kinisiley. Anasuya para etu dangor film festival(Cannes) laga 77^th edition te tailaga experience tu yaad kurikina bisi picture share kurisey. Tailaga caption te enaka likhikina thakisey,”Kapra- award pabole ageyte Cannes laga ekta flea market(sosta aro secondhand kapra bikri kora market) para joldi kinisey, kilemaney ami enaka hey korey.” Tai patra fashion designer Arjun Saluja laga brand Rishta para piece select kora laga bi mention kurisey. Tai para award pa homoitey ekta white outfit aro chunky gold jewellery pindikina thakisey. Anauya Sengupta para koisey, “77^th Cannes Film Festival te Best Actress award pa tu ekta bisi dangor somman laga kotha asey. Agey barikina, etu award pa ami first Indian manu asey koikina janiya tu aro bi bisi special asey. Ami para etu festival te judge kora artist khan ke bisi talent thaka manu khan majotey amilaga kaam ke recognize kora nimitey dhanyabad asey. Ami nimitey, etu award tu nijor laga achievement para bi barikina asey.” Anasuya Sengupta para ‘The Shameless’ laga producer, director aro cast ke bi dhanyabad disey. Tai para koisey,”Ami tu aytey amilaga film ‘The Shameless’ laga jugidi asey. Kuntu ke duniya laga alag alag jaga para amilaga producer khan para khub mehnat kurikina banaisey; Urban factory, Akka films, House on fire productions, Klas films, TPHQ aro Shanta Nepali productions kuntu para Nepal te line produced kurisey. Tai para director Konstantin Bojanov ke tailaga opor te bisi dangor bharosa rakha nimitey  aro tailogotey etu film te act kora manu khan ke khas dhanyabad disey. ‘The Shameless’ film laga kahani tu Renuka koikina ekta maiki laga asey kun ekta police officer ke moraidiya picheyte Delhi laga ekta gao bikri kora jaga para polabole kamyab hoisey. Etu film laga screening tu Cannes Film Festival te May 17 te hoisiley.