India laga alag-alag state te anti-conversion law(dhorom bodli kora laga khilaf te kanoon) lagu kora para dhorom laga azadi aro khas kurikina Christian evangelist khan ke bisi target kora laga bari te chinta ani asey. Ajikali, etu kanoon tu Arunachal Pradesh, Chhattisgarh, Gujarat, Haryana, Himachal Pradesh, Jharkhand, Karnataka, Madhya Pradesh, Odisha, Rajasthan, Uttarakhand aro Uttar Pradesh te “Freedom of Religion Acts” laga naam te chuli asey. Sa hisap te, taikhan para joborjosti, fraud, aro lalach dikina dhorom bodli kuridiya tu hataidibole aim kuriasey. Hoilebi, taikhan para etu kanoon tu kunba dhorom te hey lagu kora para bhitor te chulithaka bias kora(matlab sob logotey ekey soman suluk nokora) tu dikhai asey. Taikhan para etu kanoon tu Hindu manu khan Islam nohoiley Christianity te convert huwa homoitey cholai hoilebi jitya manu khan ‘Ghar Wapsi’ nisna program under te Hindu dhorom te wapas ahey, etu kanoon apply nokora hoijai. Northeast te Arunachal Pradesh tu first state asey, kuntu para Freedom of Religion Act,1978 laga through te etu anti-conversion law lagu kurisey. Ajikali bhitor te, Indigeneous Faith and Cultural Society of Arunachal Pradesh (IFCSAP) para etu kanoon tu tatey laga indigeneous tradition ke bachabole nimitey jaruri asey koikina etu kanoon ke pura-puri lagu kuribole demand kuriasey. Arunachal Pradesh laga Chief Minister Pema Khandu para juwa saal December te etu mamla te chulithaka behest u wapas anisey jitya tai para jor dikina koisey ki etu kanoon tu asey hoilebi active nai. Minority dhorom laga khilaf te thaka manu khan laga support para etu kanoon ke wapas ana picheyte, CM Khandu para koisey ki etu laga maksat tu kuntu dhorom ke bi target kuribole laga nohoi hoilebi tatey laga local nyom laga rakhsha kuribole nimitey asey. Christian majority aro sob dhorom ke manibole laga azadi thaka desh(jaiseki USA, Canada khan) te India laga ekdam olta dikhibo parey. Utu desh khan te, bisi alag-alag dhorom laga leaders, Hindu laga guru aro Muslim laga imam khan bi eku bhoi nakhaikina aro eku kanooni jhamila jhelibole nalagikina free para taikhan laga dhorom laga prachar kuribo parey. West(America aro Europe te thaka desh khan) faley, kun para bi desh para bi dhorom laga prachar kora laga khilaf te kanooni action noloi. Kilemaney tatey laga society khan dhorom bodli kora tu nijor laga choice asey koikina thakey. Christianity ke loikina bhoi thaka tu janibujikina ulta bhabna kuriasey. India te Hindu dhorom ke promote kora right-wing nationalist group khan para dawa kora laga ekdam olta asey, Christianity tu India te kityabi ekta dominant force thakanai. Etihas te, Christianity laga India logotey gehra sambandh asey. Etu tu 100 AD faley thakisey jitya Syria laga Christian khan Kerala te ahisey. British para India te rule kora homoitey bi, Christian manu khan laga opulation kityabi India laga total population laga 3% bi paar huwanai. Aji, BJP aro etu logotey jurikina thaka organization jaiseki RSS aro VHP khan para Christian dhorom te convet huwa tu ekta khatra nisna sai asey hoilebi India laga Census para alag kahani dikhai asey. BJP para koiasey ki Christian population tu 1981 te thaka 2.53% para next saal khan te 2.61% te uthijaisey, hoilebi asol census figure para 1981 te thaka 2.45% para 1991 te 2.32% te komijaisey koikina dikhai asey. Etu laga bawajut, BJP aro etu logotey jurikina thaka organization khan para Christian conversion laga bari te bhoi humaidibole continue kuriasey.
Asol te etu kanoon khan tu kanooni harassment kuribole laga hathyar asey, kuntu para Christian evangelist khan ke affect kuriasey hoilebi Hindu dhorom te convert huwa khan ke nazarandaz kuriasey.
Judi India para likhikina thaka nyom aro kanoon te dhorom laga azadi diya tu manikina chulibole mona sey koiley, kunba selective dhorom te hey anti-conversion law lagu kora jaanch kurikina challenge kuribo lagey.
Add Comment