Anupam Kher laga Mumbai office te chori hoisey

Mumbai, June 20 : Actor Anupam Kher para tailaga Mumbai office te chori huwa report kurisey. Tai para Thursday din te tailaga X(Twitter) account te ekta khobor share kurisey ki chor khan para tailaga Veera Desai ghor te gusikina ekta cash bhorta thaka safe aro tailaga company para shooting kora hoilebi etya tak release nokora ekta film laga negative khan bi chor kurisey. Anupam para X te ekta video share kurikina likhisey, “Juw arati, Veera Desai Road te thaka amilaga office te, duita chor gusikina accounts office te thaka ekta safe(poisa rakha locker) chor kurisey kilemaney etu chor khan para etu safe ke bhangaikina khulibole paranai.  Etu safe te amilaga company para shoot kora film laga negative khan thakisey. Amilaga office para ekta FIR file kurisey aro police para amikhan ke bharosa dilaisey ki etu chor khan joldi dhora khabole asey. Kilemaney CCTV camera para taikhan ke etu sob saman bukhikina ekta autorickshaw te jaithaka capture kurisey.” PTI laga report hisap te police para koisey ki chor khan para safe te thaka Rs 4.15 lakh poisa loijaisey. Etu ghotna tu Thursday phujur 9:45 am fale puhor te ahisey jitya office laga staff para office pungchikina tala bhangikina thaka dikhisey.