Anurag Kashyap para koisey Shah Rukh Khan, Aamir Khan, Salman Khan tu fees noloi

New Delhi, June 17 : Anurag Kashyap para bisi bar actor khan para film khan te fees bisi charge kora laga mamla uthaisey. Etu filmmaker para ekta nutun interview te Shah Rukh Khan, Salman Khan aro Aamir Khan ke taikhan laga film nimitey fees charge nokora karney tarif kurisey. Anurag para Bollywood Bubble logotey kora ekta interview te Shah Rukh, Salman aro Aamir laga movie khan emaan daami nuhuwa laga karon reveal kurisey. Anurag para actor khan laga misa misi jarurat para bisi demand kora aro star(dangor actor kha laga) fees nimitey filmlaga 50-60% production khorcha huwa te jor dikina koisey, “Jitya apni film banai, film bana para bisi khorcha tu faltu saman khan te jai. Actor khan para taikhan laga fees laga bari te care nokorey kilemaney taikhan ke market para dictate korey. Ami kiman bi film banaisey limit bhitor te thakisey. Bisi baar tu ami para ami laga fees ke noloikina chari bi diye. Ami para life te 60% para bisi film te zero fees(ektaka bi fees noloikina) kaam kurisey. Tai para agey barikina koisey, “Sobsey dangor example tu ‘Gangs of Wasseypur’ asey. Ami laga fees tu zero thakisey kilemaney ami para actor khan ke dangor star khan logotey replace kuribole mon thakanai. Ami dangor actor khan logotey kaam nokorey. Hoilebi amikhan laga film industry te sobsey bisi khorcha laga chinta kora manu khan tu 3jun dangor star asey – Shah Rukh, Salman aro Aamir. Taikhan para taikhan laga film nimitey fees charge nokorey. Taikhan sob film te poisa tu last fale loi. Etu nimitey, taikhan laga ekta film bi bisi khorcha huwa laga nai.”