Anurag Kashyap para Payal Kapadia laga success nimitey credit bisara Indian manu khan ke slam kurisey

Mumbai, June 12 : Payal kapadia para Cannes 2024 te kamyabi hasil kora para sob India manu ke garv mehsoos koraisey. Governmnet, Hindi cinema, film celebrities sob para Payal Kapadia laga etu film ‘All We Imagine As Light’ 77^th Cannes Film Festival te Grand Prix award jita nimitey etu film laga maker ke social media te congratulate kurisey. Hoilebi, Anurag Kashyap para enaka maney ki India te sob manu tu khali credit lobole mon asey aro etu tu celebration tu fake(dikhawa) asey. Press Trust of India(PTI) logotey baat-chit kora homoitey, Anurag Kashyap para koisey ki Payal Kapadia laga jeet ke pura India laga jeet nisna dikhaisey, hoilebi enaka nohoi. Kilemaney, kun para bi aro nahi India laga sarkar para enaka film  ke support korey. Payal laga alava Cannes Film Festival te etu saal aro duijun Indian para prestigious award paisey. Anasuya Sengupta tu ‘The Shameless’ film nimitey Best Actress award paisey aro Film and Television Institute of India (FTII) student Chidananda S Naik tu ‘Sunflowers were the First Ones to Know’ nimitey Best short film award paisey. Kashyap para koisey ki ‘All We Imagine as Light’ tu ekta India aro French company para milikina produce kora film thakisey aro  etu film ke ekta French company para fund kurisey. Anurag Kashyap para tailaga kotha rakhikina koisey ki India tu bisi cheez nimitey aney credit lobole khusi pai, taikhan etu film khan ke support nokorey aro taikhan para enaka film khan ke cinema te release hobole nimitey bi support nokorey.” Tai para koisey ki etu film khan release hoisey koilebi kun para bi etu ke theatre te jaikina sabole nohoi.”