Anurag Kashyap para ‘The Shameless’ film director ke budget nimitey diktar paithaka homoitey modod kurisey

Mumbai, May 29 : ‘The Shameless’ team aro etu laga director Konstantin Bojanov tu taikhan laga film 77^th Canns Film Festival te ‘Un-Certain Regard’ category te screening hobole select huwa picheyte bisi call aro message khan pai asey. Etu opor te etu film laga lead actor Anasuya Sengupta bi etu ekey category te award pa first Indian actor hoisey. IndiaToday.in logotey ekta exclusive baat-chit kora te, etu film laga director Konstanin Bojanov para etu film bana tu kinaka ekta challenge thakisey, khas kurikina film banabole poisa pabole etu laga kotha koisey. Hoilebi, filmmaker Anurag Kashyap tu taikhan nimitey ekta akha laga kiran hoikina ahisey aro taikey etu film banabole modod kurisey. Bojanov para Anurag Kashyap laga barite kotha kurikina koisey, “Amikhan tu etu film kamyab hobo na nai etu doubt thaka face kurisey aro etu nimitey budget laga bisi problem olaisey. Amikhan para etu film tu komti budget te banabole lagisey. Hoilebi, Anurag Kashyap tu bisi helpful thakisey. Aro tai tu ekbar te etu film laga idea ke support kurisey. Ami Mumbai te thaka homoitey tailaga ghor te bi buhisey. Tai para amikey film bana laga pura homoi modod kurisey, film industry logotey tailaga connection thaka manu khan logotey bi kotha kuridikina modod kurisey.” Anurag Kashyap aro Konstantin Bojanov laga dosti tu taikhan Cannes te lok kora picheyte hoisey jitya Anurag laga 2013 film “Ugly” laga Cannes festival te screening hoisiley. Taikhan duijun ke ek-dusra logotey taikhan laga ekta sathi para introduce kuridisiley. Konstantin para koisey ki Anurag tu nutun filmmakers khan ke ekdam modod diya aro supportive thaka manu asey.