AR Rahman para Cannes Film Festival te ‘Headhunting to Beatboxing’ music documentary launch kurisey

New Delhi, May 20 : Oscar jita music-composer, AR Rahman para tailaga latest music documentary ‘Headhunting to Beatboxing’ laga first look aro teaser launch kurisey kuntu tu ekta feature music documentary asey. Rohit Gupta para direct kora aro AR Rahman para produce kora ‘Headhunting to Beatboxing’ rhythm aro awas laga ekta dilchasp journey te loijai asey. Alag alag desh, tribe aro generation majotey music laga growth ke dikhaikina. Etu launch event tu Cannes te Bharat Pavilion te hoisey. Kotey AR Rahman logotey director Rohit Gupta, executive producer Abu Metha, Theja Meru aro dusra guest aro dangor manu khan mojud thakisey. Rahman para Instagram te etu laga first look bi share kurisey. Nagaland laga Chief Minister laga Advisor Abu Metha para share kurisey, “Etu music documentary banabole laga idea tu titya ahisey jitya AR Rahman para mashoor Hornbill Festival laga hisa hobole nimitey Nagaland visit kurisiley. Amikhan janithakisey ki amikhan ke etu laga hisa hobole lagibo. Etu film tu bisi creative dimag thaka manu para milikina banaisey, khas kurikina TaFMA para aro director Rohit Gupta para bisi bhal para capture kurisey. Asol hero tu Nagaland laga musician khan asey, kun khan para bisi saal purana laga kahani koi asey. Aro taikhan laga music para amikhan laga youth laga ambition(iccha) dikhai asey.” Etu film tu Rahman para produce kora second dangor film asey. Tai para etu ageyte 99 gana produce kurisey. Etu film laga executive producer khan tu Abu Metha, Adam J Greig, Theja Meru, Rohit Gupta, Sheila Houlahan aro Rohhit Daas asey.