New Delhi, August 16 : 2022 te release huwa film khan nimitey 70th National Award tu aji(August 16 te) announce kurisiley aro Oscar-winner AR Rahman laga naam bi award jita manu khan laga list te thakisey. Tai tu Mani Ratnam laga Tamil film Ponniyin Selvan- Part 1 te tailaga kaam nimitey National Film Award for Best Music Director(Background Score) jitisey. Etu film tu 2022 te ekta blockbuster hoisiley. Etu award para AR Rahman ke 7ta National Award jita laga record disey kuntu tu India te ekta music director para jita etya tak laga sobsey bisi award asey. AR Rahman para Tamil film te ekta music director hoikina tailaga official entry tu 1992 te Mani Ratnam laga film ‘Roja’ logotey kurisey. Aro tatey para tailaga etu dangor journey laga suruwat kurisey. Tai tu ‘Roja’ nimitey tailaga first National Award for best Music laga award jitisey. Etu picheyte 1996 te Minsara Kanavu nimitey bi etu ekey award jitisey. Saal 2000 tak te tai para bisi alag alag bhasa te music score kora already suru kuridisiley. Aro 2001 te Hindi film Laagan nimitey tai National Award jita tu asurit laga kotha thakanai. Etu picheyte tai logalog 2002 te Mnai Ratnam laga film Kannathil Muthamittal nimitey aro ekta award jitisiley. 2002 picheyte, Rahman tu duniyabhor te bisi award jitisey jaiseki Golden Globes, Critics Choice Movie Awards aro Oscar.
AR Rahman tu music nimitey 7th National Award paisey
Add Comment