West Bengal, 3 February : Bollywood superstar Aamir Khan, recently playback singing pora retirement announce kora singer Arijit Singh logot milibole West Bengal Jiaganj te tai laga ghor te visit korise. Actor tu Sunday din Kolkata ahise aru airport te prothomte paparazzi khan pora lukabole try korise, kintu last te camera te dhora porise—haahi diya aru haat hilaikena.
Report anusar, Aamir Kolkata pora road loi direct Jiaganj te Arijit Singh laga gharot jaise, Sunday rati late paat ahibo tak pura visit tu discreet rakhibole try korise. Kintu lukai thakibo try korileo, Aamir presence video khan online ahise aru viral hoise, jitu neighbourhood r manu aru fan khan ke alert kori dise.
Monday duporiya, February 2, Aamir Khan ke Arijit Singh r gharor rooftop te dekhise, juntu singer r studio kuina use korise, Jiaganj Shibtala Ghat osor te. Social media te circulate kora visuals te dekhise ki Aamir patang uraise, logote tai laga crew member khan thakise itu moment filming hoi ase kuina hint dise. Itu scene dekhi pichet terrace khan te bohut manu jama hoise, Bollywood star ke ekbar dekhibole. Kiba report anusar, filming chali thaka somoy Arijit Singh ke alpo somoy frame pora bahar jai thaka dekhaise.
Aamir Khan itu visit tu ahise Arijit Singh playback singing pora retirement announce korar keitai din pichete. Arijit 15 bochor dhori industry te kaam korar pichete decision loise. Duita artist majot bohut successful professional association thakise, aru tiahan milikena bohut yaadgaar gaan korise—Naina (Dangal), Tere Hawaale, Tur Kalleyan, Phir Na Aisi Raat Aayegi (Laal Singh Chaddha), aru Sar Aankhon Pe Mere (Sitaare Zameen Par).
January 28 te, Arijit Singh social media te announce korise ki etiya pora nôtun playback singing assignment accept nokoribo.
Aamir Khan kio Arijit Singh laga gharot jaise itu visit laga exact karon tu publicly disclose kora hua nai.
Add Comment