Arijit Singh para UK concert te  ekjun maiki fan ke maafi mangisey

New Delhi, September 26 : Arijit Singh para recently UK te tailaga concert chuli thaka homoitey ekta security guard ke gusa uthisey. Ekta fan para tailaga social media account te share kora video te, Arijit tu utu security guard para ekjun maiki fan logotey kinaka beybohar kuri thakisey etu dikhikina apsoos hoisey. Etu video te jitya Arijit paratailaga show chuli thaka homoitey security guard para  utu maiki fan laga gola dhora dikhisey tai para  utu fan ke maafi manga dikhisey. Etu video laga suruwat te background te utu maiki  para security guard ke tailaga gola dhora nimitey sawal kora dikhisey. Etu picheyte, Arijit para tai perform kurithaka homoitey bich te  rukhikina mike te kotha kurikina koisey, “Kunba ke enaka dhora(gola fale isara kurikina) tu thik nai.’ Etu picheyte tai para utu security guard khan ke point kurikina koisey, “Guys, please buhi jabi.” Aro utu maiki fale ghurikina tai para koisey, “Ami ke maaf kuridibi, ma’am. Kash ami apni ke bacchaidibole para, hoilebi ami pra paranai. Please buhibi.” Arijit para Bollywood playback singinging laga suruwat tu Mohit Suri laga ‘Murder 2’ logotey kurisey. Tai para etu film te Phir Mohabbat gana kurisey kuntu te Emraan Hashmi aro Jacqueline Fernandez thakisey. Etu picheyte tai Agent Vinod film laga ‘Raabta’ gana, Cocktail para ‘Yaariyan’ gana aro Barfi film para Phir le aaya dil gana logotey mashoor hoisey.