National

Army khan Himalaya nisna majboot thaka tak tu India suraksit thakibo

November 13, 2023

New Delhi, November 12 : Prime Minister Narendra Modi para Himachal Pradesh laga Lepcha jaga te sipahi khan logotey milikina etu saal laga Diwali manaisey. Tatey laga sipahi khan ke address kurikina PM Modi para koisey, “India tu amikhan laga Army khan tu border fale Himalaya  nisna majboot aro hilabole napara nisna thaka tak tu suraksit asey.”

Prime Minister para duniya te larayi jhagra chuli thaka majotey Army para border te surakshit rakhibole nimitey taikhan laga role nibha laga tariff kurisey. Tai para sipahi khan ke koisey, “Aji kali duniya laga situation ke saikina, India laga side para expectation tu lagatar bari asey. Enaka mamla te, India laga border ke suraksit thakibole jaruri asey. Amikhan para desh te shanty laga ekta mohol banai asey aro etu te apni para nibhabole para laga dangor role asey.”

Etu opor te tai para enaka bi koisey ki India laga Army aro security firces khan para lagatar desh ke agey barabole nimitey kaam kurisey.

PM Modi para Army jawan khan logotey Diwali mana laga tailaga nyom te kotha koisey aro koisey ki tai tu enaka juwa 30 to 35 saal para kuri asey. Tai para koisey ki etu nyom tu tai Gujarat laga Chief Minister nohoilebi India laga Prime Minister nuhuwa agey para cholaikina ahi asey.

Tai para sipahi khan ke taikhan laga parivar khan para dur thakikina Diwali mana karney sabashi disey aro koisey, “ Enaka koi ki, tyohar tu khali utu jag ate hey mania kotey parivar khan thakey, hoilebi aji, apnikhan sob tu apni khan laga parivar para dur hoikina border te thaki asey. Etu para apni laga duty te pura mon diya laga sobsey successful point ke dikhai asey.”

Tai para koisey ki tai nimitey, sipahi khan ke duty te dhala jaga khan tu mandir para komti nohoi.

PM Modi para koisey ki India tu defence laga sector te  etya ekta “global player”(duniya laga khilari) hoi asey aro khali India laga defence(hathyar khan laga) jarurat khan pura hoi thaka hey nohoikina, India logotey bhal rishta thaka desh khan laga defence(hathyar khan) jarurat bi pura hoi asey. Tai para koisey ki 2016 aro etu saal laga Diwali majotey, India laga export tu 8 guna bisi barijaisey aro desh te defence(hathyar khan) produce kora tu etya Rs 1 lakh crore asey.