Agencies: Thursday te Arsenal aro Chelsea toh Europa League laga last 16 te pungchibole parishe. Thursday din te Gunners khan aram para BATE Borisov 3-0 para harai dibole parishe. Aro Maurizio Sarri laga side toh Malmo khilaf te match jeeti kena pressure toh olop relieve paishe. Arsenal toh Belarus te 1-0 para harishe. Hoile bhi Thursday din laga match toh Arsenal khan toh khali teen minute bhitor te BATE Borisov logote aggregate te aki hoijaishe. Aro match khotom huwa samay te Arsenal toh BATE Borisov khilaf te 3-0 para match toh jeeti kena Europa League laga last 16 te pungchi jaishe.
Emery para BT sports ke koishe ami khan etu results toh lagi thakishe hoile bhi ami khan nijor laga supporters khan nimite bhal para khelibole echa thakishe. Ami khan wapas ahibole lagi thakishe aro etu nimite team para bishi bhal para perform kurishe.
Chelsea toh Europa League laga 1st leg match te 2-1 banabole parishe. Etu bar Chelsea khan toh match te goal maribole nimite dos (10) minute tok rukha pichete goal mari dishe. Oliver Giroud, Ross Barkley aro Callum Hudson-Odoi para Stamford Bridge te Chelsea nimite goals mari kena Chelsea ke Europa League laga last 16 te pungchibole modot kurishe.
Carlo Ancelotti laga Napoli team toh FC Zurich te 2-0 para jeetishe. Aggregate hesab te tai khan 1st leg result aro 2nd leg result melai kena 5-1 para jeetishe. Inter Milan toh Rapid Wien khilaf te 5-0 para jeetishe.
Add Comment