Arunachal journalist accident te morishe

April 6, 2021. Monday rati Changlang district te Arunachal Pradesh laga journalist ek jun rasta accident te morishe. Journalist Jason Khangthing toh Arunachal Today te correspondent neshina kam kori thakishe. Tai toh bike te Miao para ahi thaka samai accident toh hoishe. Etu accident toh Miao town para 6 km jaikena Mpen te howa ase koishe. Khobor hesab te, tai laga uncle para bike toh jolaishe aro tai bechete bohi thakishe. Mpen, 4^th mile point te tinta(3) tractors tai khan akhe te thakishe, etu samai tuita (2) tractors akhe te jaishe aro tinta(3) wala tractor laga beche te marishe koishe. Jason Khangthing ke Dibrugarh hospital te besi serious loikena jaishe. Tractor laga driver logot driving license thaka nai koishe. Etu accident nemte khobor toh detail te investigated koriboli ase koishe aro press fraternity para tai mora oper te mon dukh howa janaishe. “Khangthing toh promising journalist aro tai logot bhal neum besi thakishe. Tai mora nemite ami khan besi mon dukh ase,” koikena Arunachal Pradesh Union of Working Journalists, Arunachal Press Club, aro Arunachal Electronic & Digital Media para etu kotha toh janaishe. Joint statement te etu incident toh bhal para investigation koriboli janaishe. “etu mon dukh samai, ami khan laga parthana toh tai laga ghor manuh oper te ase,” koikena statement te aro koishe.