Guwahati, December 12 : Arunachal Pradesh State Commission for Protection of Child Rights (APSCPCR) para Monday din te Arunachal te olop din ageyte ekta primary school te 20ta baccha laga opor te sharirik(gao logotey jurikina thaka) punishment diya laga opor te dukh jataisey.
Etu ghotna tu Arunachal laga Pakke-Kessang district te Patanjali Ayurveda Pvt Ltd para chola ekta primary school Acharyakulam te hoisey.
APSCPCR member secretary, Khoda Rakhi, kun para Monday din te etu Pakke Kesang district laga Seijosa jag ate thaka school ke kunba senior official khan logotey etu mamla laga huda hudi kuribole nimitey tatey pungchisey tai para koisey ki etu school laga in-charge ke arrest kuribo lagey.
Etu school ke chola trust para in-charge ke service para olaidisey.
Inquiry kora homoitey, etu team kuntu te Seijosa laga additional deputy commissioner T R Tapu, sub-divisional police officer S C Norbu, Child Welfare Committee (CWC) member Nabam Petru shamil asey taikhan para etu hatsa laga sikar huwa baccha aro taikhan laga ama baba khan logotey bi baat chit kurisey.
Rakhi para ekta bayan te koisey ki etu team para janibole parisey ki Class 1 para 4 tak pora 20ta student ke etu school laga in-charge Sadhvi Devkriti para December 7 te class chuli thaka homoitey biya para marisey.
Aro etu picheyte etu in-charge para student khan ke dhomki disey ki judi taikhan para ama baba ke etu ghotna laga jankari disey koiley etu laga natija biya hobo.
Ama baba khan para etu mamla laga jankari titya paisey jitya taikhan para bacha khan laga gao te jokhom kha tu dikhisey.
Etu school ke chola Patanjali Yogpeeth Trust laga secretary general kun para etu school ke cholai, tai para December 10 te, Sadhvi Devkriti ke service para hataidisey.
Hoilebi, etu commission para koisey ki taikey khali service para olaidiya tu kafi nohobo.
APSCPCR para bayan te enaka koisey, “ Etu maiki ke logalog arrest kurikina kanoon laga kunba section laga under te book kuribo lagey aro thik thak sajai dibo lagey.”
Sunday din te social media(whatsapp, facebook, instagram, X(twitter)) te, etu teacher para baccha khan laga gao te bisi jokhom kurikina thaka laga video viral hoisey kuntu para rajya laga manu majotey bisi gusa feilai disey.
Etu homoitey, Arunachal Pradesh Women’s Welfare Society (APWWS) para etu ghotna ke loikina APSCPCR ke ekta letter likhisey.
Etu commission para homoi homoitey rajya laga sarkar ke baccha khan laga khilaf te enaka jurum hoithaka laga mamla tu kom kuribole nimitey sarkar aro private educational institute duita laga under te bi kaam kora sob employee laga character antecedents(poila laga jibon laga jankari) ke strict para verify kuribole nimitey recommendation submit kurikina ahi asey.
APSCPCR para koisey ki Acharyakulam School tu 2019 para chulikina aha laga bawajut bi etya tak bi register koranai. Etu panel para education department ke etu school laga management laga khilaf te kara action lobole koisey.
Add Comment