Itanagar, December 17 : Aunachal Pradesh laga Seijosa jag ate thaka Goloso busti te thaka Acharyakulam School te December 7, 2023 te 20 para bisi student khan ke biya para mara picheyte, December 17, 2023 te Uttar Pradesh para Sadhvi Devkriti koikina ekjun Mataji(Teacher) ke arrest kurisey. Etu school tu ekta dangor hebal bagan laga bhitor te asey kuntu tu nijor ke tantrik asey koikina dawa kora Baba Ramdev laga Patanjali Ayurveda laga asey. Etu school laga opor te etya jaanch partal chuli asey.
Etu ghotna tu titya samne te ahisey jitya ekjun baccha para markhaikina jokhom pa tu dikhaidiya laga video social media(facebook, whatsapp, instagram) te viral hoisey. Aro etu viral huwa picheyte Arunachal laga society laga sob manu khan para enaka harkat ke condemn kurisey. Etu Acharyakulam School, kuntu toh juwa dui saal para chuli asey etu ke Patanjali Yogpeeth Trust para cholai kuntu toh sarkar para recognize nukurikina thaka institution asey.
Public khan para gusa jata laga jawab te, Patanjali Yogpeeth Trust para joldi se December 10 te, Sadhvi Devkriti ke service para olaidisey. All Pakke Kesang District Students Union (APKDSU) para December 12 te ekta shanty laga rally rakhikina, RWD Colony para Seijosa town laga Nyokum Ground tak beraikina jaisey. Students, ama baba aro stakeholder khan para etu rally te bhak loisey aro mujrim ke Right to Education Act 2009 aro etu alag kanoon hisap te kara sajai dibole demand kurisey.
Media ke kotha kurikina, Pakke Kesang jaga laga SP, Tasi Darang para etu teacher Sadhvu Devkriti ke arrest kora tu confirm kurikina koisey, “ December 10, 2023 te amikhan para Article 342/323 IPC aro Juvenile Justice (Care and Protection) Act laga nyom under te ekta case register kurisey. Ekta viral video te, mujrim Sadhvi ke identify kora picheyte, taikey Uttar Pradesh te arrest kuribole nimitey ekta team pathaisey. Taikey December 17, 2023 te court laga samne te pesh kurisiley.”
Ekjun parent para tailaga baccha ke sadma lagiya tu jataikina koisey, “ Amilaga chokra tu school te wapas jabole mana kuri asey. Tai tu dusra school te jabole jeed kuri asey.” Etu school laga student laga bisi ama baba khan para bi enaka ekey mamla share kurisey aro taikhan laga baccha laga suraksa aro bhalayi nimitey zimidari lobole lagiya la jarurat tu janaisey.
Add Comment