Itanagar, October 19 : Indian National Congress (INC) aro National People’s Party (NPP) laga 48 maan member khan para Arunachal laga Ppaum Pare district laga Sangdupota circle under te thaka Tapioso te mass joining huwa te BJP party ke join kuri loisey.
Doimukh assembly constituency laga under te thaka Sangdupota circle laga Tapioso area tu ekta bustu aro bhitor jaga asey kotey kunba jaga khan te 4-chaka gari bi pungchibole naparey kilemaney khali dui-chaka gari hey cholabole parey.
Tatey laga local MLA Tana Hali Tara para etu jaga laga manu khan ke BJP party te join kuribole dibole nimitey ekta dangor tour kuri asey.
Etu tour tu bike aro scooter cholaikina suru hoisey kotey MLA para bi bhal rasta nathaka jaga laga manu khan tak pungchibole nimitey bike cholaikina jai asey. Aro etu tour aro party join kora laga program tu tailaga jaga te development laga kaam kinaka chuli asey etu check kuribole nimitey thakisey.
Rasta laga connection thik thak hobole lagiya laga jarurat te kotha kurikina MLA Hali para tatey jama huwa manu khan ke taikhan laga Tappioso circle te dangor rasta bana laga project ahi asey koikina janaisey.
Tai para koisey, “ Etu tu ekta diktar thaka jaga asey aro Congress para etu jaga cholai thaka homoitey etya tak etu area nimitey 43 crore fund release kurisey hoilebi etya tak bi rasta tu nai. 2019 te ami laga tenure suru huwa homoitey 2 saal covid pandemic thaka laga bawajut bi tatey laga manu khan para 3ta bridge Rikso, Yasumso aro Papum River bridge paisey kuntu para 26 km area cover korey.”
Tai para koisey ki tender dhali loisey aro rasta bana laga kaam aro nutun bridge bana laga kaam tu joldi suru hoijabo. Etu area para dusra taraf laga Pakke Kesang district ke chui aro etu jag ate development laga bisi jarurat asey.
Add Comment