Ashwini Ponnappa aro Satwik Rankireddy jetise

Agencies, 19 September: Wednesday de, Indian mixed doubles pair Satwiksairaj Rankireddy aro Ashwini Ponnappa pora Commonwealth Games silver medallists England’s Marcus Ellis aro Lauren Smith logode haraidese. Tai jun USD 1 million China Open laga pre-quarterfinals de kushi kena ase. Poila World No 25 Satwiksairaj and Ashwini toh tui-par English group logode hari kena thakise. Tai jun etu par match toh 21-13 20-22 21-17 score pora jeti loise aro khel toh ek-khonda aro tin-minute de kothom howah thakise. Satwik pora PTI logode kowah toh, aji laga match phal thakise. Tai khan mon dangor kori kena khelise koise aro plan hesab de khelijaa karni last de olob sosta howah thakise koise. Indian pair toh next top seed Chinese Zheng Siwei aro Huang Yaqiong logode khelibole ase. Jowah hapta Japan Open laga quarter final de kushi-kena thaga  seventh seed Srikanth be pre-quarterfinals de kushi kena ase. Tai Denmark’s Rasmus Gemke logode 21-9 21-19 score pora haraideya thakise. Tai next Thailand’s Suppanyu Avihingsanon logode khelibole ase. Commonwealth Games de silver medal jeti kena thaga men’s doubles pair Satwik aro Chirag Shetty toh Malaysia khelari Goh V Shem aro Tan Wee Kiong logode 19-21 20-22 pora jeti kena ase. CWG bronze medallists Ponnappa aro N Sikki Reddy be Korean khelari Kim So Yeong aro Kong Hee Yong logode 10-21 18-21 score pora hara thakise. Suru time pora mixed doubles khel toh ektum dekthari thakise. Indian aro English pair be eki-logode 4-4 pora jaa thakise. Etu bechide Satwik aro Ashwini pora jar-ta point loi-kena 8-4 lead lowah thakise. Etu time pora points de gap thaki-kena opening game loi-lowah thakise. Second game de Marcus aro Lauren toh 6-1 lead lowah thakise. Hoilebe Indian pair toh asti khel kheli kena 20-20 level howah thakise. Hoilebe English group toh agae khel jai thakibo karni tuita points lagi thakise. Decider de, Satwik aro Ashwin toh 7-1 score pora agae thakise. Break time de duo toh 11-5 pora lead thakise. Aro break bechide, Marcus aro Lauren toh 13-15 bonabole para thakise. Hoilebe Indian duo toh 18-13 score pora match jeti-lowah thakise.